ՄԱԿ նոր զեկույցում գրանցված գնահատականների համաձայն՝ COVID-19 համավարակի հետեւանքով 2020 թվականի կեսին միջազգային միգրանտների թիվը 2 միլիոնով կրճատվել է փակ սահմանների եւ ամբողջ աշխարհում ուղեւորությունների դադարեցման պատճառով, հայտնում է Associated Press-ը:
Գնահատականների համաձայն՝ ակնկալվող աճը կկրճատվի 27 տոկոսով:
ՄԱԿ Տնտեսական եւ սոցիալական հարցերով դեպարտամենտի ժողովուրդների եւ բնակչության բաժնի զեկույցի գլխավոր հեղինակ Քլեր Մենոցին մամուլի ասուլիսում հայտարարել է, որ 2019 թվականի կեսից 2020 թվականի կես կանխատեսվում էր միջազգային միգրացիայի 7-8 միլիոնով աճ:
Բայց մարտից սկսած, երբ համավարակը ընդգրկել էր ամբողջ Երկրագունդը, փակ սահմանները եւ ուղեւորությունների սահմանափակումը 4 ամսվա ընթացքում հանգեցրել են զրոյական աճի եւ միջազգային միգրանտների ակնկալվող թվի 2 միլիոնով կրճատման, ասել է Մենոցին:
2020 թվականի օգոստոսին բաժնի տնօրեն Ջոն Ուիլմոթը նշել էր, որ «ուղեւորությունների ավելի քան 80 հազար սահմանափակում է մտցվել ամբողջ աշխարհի 219 երկրներ կամ տարածքներ»:
Վերջին 20 տարում աշխարհում դիտվում է միջազգային միգրանտների թվի կայուն աճ: