Ֆրանսիայի առողջապահության գերագույն մարմինը (ԱԳՄ) խորհուրդ է տվել կորոնավիրուսի պատվաստանյութի դոզաների միջակայքը մեծացնել մինչեւ վեց շաբաթ, ինչը պետք է օգնի արագացնել պատվաստման գործընթացը, հաղորդել է «ՌԻԱ Նովոստին»:
Հայտարարության մեջ առողջապահական մարմինը նշել է, որ պատվաստման արագացումը անհրաժեշտ է կորոնավիրուսի նոր մուտացիաների առաջացման եւ կորոնավիրուսով վարակների ավելացման պայմաններում: Ներկայումս Pfizer / BioNTech պատվաստանյութի առաջին եւ երկրորդ ներարկումների միջակայքը 21 օր է, իսկ Moderna պատվաստանյութինը՝ 28 օր: Ընդ որում, Pfizer-ի պատվաստանյութի առաջին դոզան, ինչպես հաղորդվում է, պաշտպանություն է ապահովում ներարկումից հետո 12-րդ օրվանից, իսկ Moderna-ինը` 15-րդ:
«Հոսպիտալացման կամ մահվան վտանգի մեջ գտնվող ավելի շատ մարդկանց արագ պաշտպանելու համար գերագույն մարմինը խորհուրդ է տալիս պատվաստանյութերի (Pfizer եւ Moderna) երկու դոզաների միջեւ ժամանակը հասցնել վեց շաբաթվա»,- ասվում է կարգավորողի հաղորդագրության մեջ:
Ներարկումների ժամանակահատվածի ավելացման նպատակը պատվաստանյութի առաջին չափաբաժինը ռիսկի ենթակա հնարավորինս շատ մարդկանց ներարկելն է: Առաջին դոզան արդեն կապահովի վիրուսից պաշտպանությունը, իսկ երկրորդը կարող է տրվել ավելի ուշ, ասել են բժշկական մարմնում:
«Այս միջոցառման իրականացման առաջին ամսվա ընթացքում լրացուցիչ կպատվաստվի առնվազն 700 000 մարդ»,- նշվում է հայտարարության մեջ:
Առողջապահական մարմինը առաջարկություններ է անում, բայց որոշումներ չի կայացնում: Այնուամենայնիվ, ինչպես նշում է Parisien թերթը, կարգավորողի հայցը` դոզանների միջեւ ընդմիջումը 42 օր դարձնելու մասին, առողջապահության նախարարությունը շուտով պետք է հաստատի:
Pfizer-ի (ԱՄՆ) եւ BioNTech-ի (Գերմանիա) դեղամիջոցներով պատվաստումների արշավը սկսվել է դեկտեմբերի 27-ին, հունվարի 8-ին ֆրանսիական կարգավորողը օգտագործման համար հաստատել է նաեւ Moderna ամերիկյան ընկերության արտադրության պատվաստանյութը: