Եվրոպական խորհրդի նախագահ Շառլ Միշելը հույս ունի, որ ԵՄ-ում կորոնավիրուսի դեմ երրորդ պատվաստանյութը կստանա կիրառման թույլտվություն եւ կհանվի շուկա արդեն հաջորդ շաբաթ, հաղորդում է ՏԱՍՍ-ը:
«Մենք հույս ունենք, որ առաջիկա շաբաթվա ընթացքում պատվաստումների արշավն ավելի արագ տեմպերով կընթանա: Եւ մենք կունենանք բոլոր հիմքերը հուսալու, որ այս շաբաթ կամ մինչեւ հունվարի վերջ թվով երրորդ պատվաստանյութը կներկայացվի շուկային: Դա կմեծացնի մեզ մոտ առկա պատվաստանյութերի քանակը»,-ասել է Միշելը: Նա չի նշել պատվաստանյութի անվանումը, սակայն Europe 1 տադիոկայանի տվյալներով՝ խոսքը վերաբերում է բրիտանա-շվեդական AstraZeneca եւ Օքսֆորդի համալսարանի պատվաստանյութին:
«Բոլոր հետազոտությունները մատնանշում են, որ տիրապետության ներքո բոլոր պատվաստանյութերն արդյունավետ են: Հնարավոր է միայն, որ դրանց արդյունավետության աստիճանը փոքր-ինչ ցածր է կորոնավիրուսի նոր տեսակներին հակազդելու հարցում»,-նշել է Եվրախորհրդի ղեկավարը:
Միշելը նշել է, որ ներկայում բնակչության շրջանում կա վստահություն պատվաստման նկատմամբ, սակայն խոստովանել, որ բավականին դժվար կլինի մինչեւ ընթացիկ տարվա ամառ պատվաստել բնակչության 70 տոկոսին: «Այդ ամենը կարող է կախված լինել այն դժվարություններից, որոնք դեռեւս կարող են ի հայտ գալ եւ որոնց մասին մենք այժմ պարզապես չգիտենք»,-ընդգծել է նա:
