«Քաղաքացիական պայմանագիր» կուսակցության անդամներին Ա կետից Բ կետ տեղափոխելը վարչական ռեսուրսի կիրառում անվանելն անլուրջ է: Այս մասին մարտի 2-ին լրագրողների հետ զրույցում ասաց ԱԺ իշխող «Իմ քայլը» դաշինքից ընտրված փոխխոսնակ Ալեն Սիմոնյանը:
Նա ընդունեց, որ մարդկանց տեղափոխումը հանրահավաքին կազմակերպված էր, բայց, նրա խոսքով, դա վարչական ռեսուրսի կիրառում կարելի էր անվանել, եթե իրականացվեր, օրինակ, պաշտպանության նախարարության կամ ոստիկանության ավտոբուսներով: «Ինչ վերաբերում է համացանցում հայտնված գրառումներին, ապա դրանք կարելի է փոփոխել եւ վերափոխել»,- նշեց Սիմոնյանը:
Խորհրդարանի փոխնախագահի խոսքով՝ Հայաստանի վարչապետ Նիկոլ Փաշինյանի վարկանիշը տասնյակ անգամ բարձր է, քան ընդդիմության բոլոր ներկայացուցիչների վարկանիշը:
Նա ավելացրեց, որ բացի հիշատակի միջոցառումներից, երեկ տեղի է ունեցել նաեւ հանրահավաք, այսինքն՝ քաղաքական միջոցառում, «որը դարձավ հավաքական ուժի ու միասնության ցուցադրում»:
