Հակահամաճարակաբանական միջոցները պահպանելու անհրաժեշտության մասին ՀՀ առողջապահության նախարարի կոչը նորմալ եմ համարում: Այս մասին NEWS.am-ի հետ զրույցում ասաց ՀՀ տուրիզմի հայկական ֆեդերացիայի նախագահ Մեխակ Ապրեսյանը:
«Դրա հետ մեկտեղ կարեւոր է, որպեսզի նախարարությունը միջազգային գործընկերներին տեղեկացնի, որ մեր երկիրը կորոնավիրուսի տեսանկյունից համեմատաբար լավ ցուցանիշներ ունի»,-նշեց նա:
«Պետք է անել անհրաժեշտ ամեն ինչ, որպեսզի Հայաստանը չհայտնվի զբոսաշրջային անցանկալի ուղղությունների ցուցակում: Եթե կան երկրներ, որտեղ Հայաստանն այդ ցուցակում է, պետք է դուրս բերել այդ ցուցակից: Մեր հիմնական թիրախային շուկաները (երկրները), ցավոք, գտնվում են «կարմիր գոտում», այսինքն՝ երկրների ցուցակում, որտեղ խորհուրդ չի տրվում զբոսաշրջային այց կատարել»,-հավելեց Ապրեսյանը:
Նրա խոսքով՝ համաճարակաբանական տեսանկյունից Հայաստանում նկատվել է դրական միտում՝ նվազել է վարակվածների թիվը, լավացել է թեստերի եւ վարակվածների հարաբերակցությունը:
«Այնպիսի տպավորություն էր, որ մենք գնում ենք կորոնավիրուսից լրիվ ազատման»,-եզրափակեց Ապրեսյանը:
Հիշեցնենք, որ այսօր կառավարության նիստի ժամանակ Հայաստանի առողջապահության նախարար Անահիտ Ավանեսյանը հայտարարեց, որ կորոնավիրուսով վարակման հաճախականության աճի հետ կապված անհրաժեշտ է վերադառնալ դիմակային ռեժիմի պահպանմանը եւ խստորեն պահպանել անվտանգության բոլոր կանոնները:
