Իսրայելցի բարձրաստիճան պաշտոնյաներն անհանգստացած են 2015-ի իրանական միջուկային գործարքին վերադառնալու ԱՄՆ-ի մտադրությամբ:
Իսրայելցի պաշտոնյաները մտահոգված են Իրանի հարցով ԱՄՆ հատուկ բանագնաց Ռոբ Մալիի հարցազրույցի կապակցությամբ, որում նա քննարկել է վերադարձը 2015-ի Գործողությունների համատեղ համապարփակ ծրագրին:
«Եթե դա ամերիկյան քաղաքականությունն է, մենք մտահոգված ենք»,- Jerusalem Post-ին ասել է իսրայելցի պաշտոնյան:
Աղբյուրը պարբերականին հայտնել է, որ հարցազրույցը «տարակուսանք» է առաջացրել իսրայելցի ամենաբարձրաստիճան պաշտոնյաների շրջանում, քանի որ «նախկինում Բայդենի վարչակազմը խոսում էր «ավելի երկարաժամկետ եւ ամուր» գործարքի մասին, իսկ այդ մասին [Մալիի հետ հարցազրույցում] ոչինչ չկար: Նա խոսում էր միայն 2015-ի գործարքին վերադառնալու մասին»: «Ամբողջ հարցազրույցում Մալին չի ասել, որ նպատակն է թույլ չտալ Իրանին միջուկային զենք ձեռք բերել,- թերթին ասել է աղբյուրը:- Նա ոչինչ չի ասել իրանցիների չարամիտ պահվածքի կամ տարածաշրջանում ամերիկացի դաշնակիցների հետ խորհրդակցությունների կարեւորության մասին»: