Մոսկվայից պաշտոնական բացատրություններ չեն եղել ԵԽԽՎ-ում քվեարկության վերաբերյալ, ուստի դժվար է ինչ-որ բան ասել: Այս մասին ապրիլի 20-ին Հայաստանի Ազգային ժողովում ավանդական ճեպազրույցի ժամանակ ասաց «Իմ քայլը» իշխող դաշինքի պատգամավոր Արման Եղոյանը՝մեկնաբանելով ԵԽԽՎ-ում Ռուսաստանի պատվիրակության անդամների՝ Ադրբեջանի եւ Թուրքիայի հետ սոլիդար քվեարկությունը հայ գերիների խնդրի վերաբերյալ:
Պատգամավորն առաջարկեց սպասել հայկական պատվիրակության անդամների՝ Երեւան ժամանմանը եւ հետաքրքրող բոլոր հարցերը նրանց ուղղել, այդ թվում՝ քվեարկության վերաբերյալ:
Ընդ որում, նա նշեց, որ հայ գերիների հարցը կքննարկվի այսօր ԵԽԽՎ լիագումար նիստին՝Երեւանի ժամանակով 18:00-ին: Ըստ այս ընթացակարգի, Եղոյանի խոսքով, բանաձեւի ընդունում չի սպասվում: «Բայց դա քայլ է: Չի բացառվում, որ հաջորդ քայլը լինի որոշակի բանաձեւի ընդունումը, սակայն՝ արդեն հետագա ընթացակարգերում, որոնք նման միջոցների ներդրում են թույլ տալիս»,- շեշտեց պատգամավորը:
Հիշեցնենք, որ Եվրախորհրդի Խորհրդարանական վեհաժողովի պաշտոնական կայքում արտակարգ դրությամբ գարնանային նստաշրջանի օրակարգում հայ ռազմագերիների հարցը ներառելու հարցի շուրջ անվանական քվեարկության արդյունքները հայտարարվել է 93 պատվիրակ «կողմ» քվեարկեց «Հայ ռազմագերիներ, այլ ռազմագերիներ և տեղահանվածներ» հարցը օրակարգ ներառելուն, 21 պատվիրակ դեմ քվեարկեց, իսկ 18 ձեռնպահ:
Ինչպես ավելի վաղ հայտնել էր NEWS.am ը, 93 պատվիրակ կողմ է քվեարկել «Հայ ռազմագերիներ, այլ գերիներ եւ տեղահանվածներ» հարցն օրակարգ մտցնելուն, 21-ը՝ դեմ, 18-ը ձեռնպահ է մնացել: Դեմ քվեարկած ԵԽԽՎ 21 պատվիրակներից, ինչպես երեւում է արդյունքներից, 8-ը ներկայացնում են Թուրքիան, 6-ը՝ Ադրբեջանը, 5-ը՝ Ռուսաստանը, այդ թվում՝ Ռուսաստանի պատվիրակության ղեկավար Լեոնիդ Սլուցկին եւ նախկին գեղասահորդ Իրինա Ռոդնինան, 1-ական պատվիրակ Հունգարիայից եւ Սերբիայից:
Ռուսաստանի պատվիրակության եւս 7 անդամ ձեռնպահ է մնացել, դրա անդամներից ոչ մեկը կողմ չի չքվեարկել: Հատկանշական է, որ թուրքական պատվիրակության անդամներից մեկը կողմ է քվեարկել հարցի ներառմանն օրակարգում: Հայաստանի պատվիրակությունը դեռ չի մեկնաբանել իրավիճակը:
