Շրի Լանկայի կառավարությունը եւս երկու շաբաթով երկարաձգել է ուղեւորությունների գործող արգելքը, քանի որ առողջապահության ոլորտում փորձագետները նախազգուշացրել են երկրի առողջապահական համակարգի հնարավոր ձախողման մասին կորոնավիրուսի տարածման պատճառով, հաղորդում է AP-ն:
Շրի Լանկայում ներկայում գործում է 1-շաբաթյա արգելք ուղեւորությունների համար, որը պետք է չեղարկվեր մայիսի 28-ին: Սակայն երկուշաբթի կառավարությունը հայտարարել էր, որ խիստ մեկուսացումը կերկարաձգվի մինչեւ հունիսի 7-ը: Այդ ժամանակահատվածում արգելքը կթուլանա մի քանի ժամով, որպեսզի մարդիկ կարողանան գնել սննդամթերք եւ առաջին անհրաժեշտության այլ ապրանքներ իրենց տների մոտակայքում գտնվող խանութներից:
Առողջապահության նախարարության վերջին վիճակագրական տվյալներով՝ Շրի Լանկայում գրանցված է 161 242 վարակվելու դեպք, մահացել է 1178 պացիենտ:
Բժիշկները կանխատեսում են, որ պացիենտների թիվը կարող է արագորեն աճել հաջորդող երկու շաբաթների ընթացքում անցած ամիս Նոր տարին տոնելու պատճառով: