Առեւտրի համաշխարհային կազմակերպության (ԱՀԿ) անդամ երկրները պայմանավորվել են ակտիվացնել COVID-19-ի արտադրանքի հասանելիությունը բարելավելու բանակցությունները, քանի որ զարգացող երկրները հանդես են գալիս կորոնավիրուսային պատվաստանյութերի արտոնագրային եւ այլ իրավական պաշտպանությունները մեղմացնելու առաջարկով, իսկ որոշ հարուստ երկրներ շարունակում են կտրուկ դեմ լինել, հայտնում է AP-ն:
ԱՀԿ մտավոր սեփականության խումբը, որը ներառում է տեխնոլոգիական նորարարությունների արտոնագրերը, ինչպիսիք են պատվաստանյութերը եւ դրանց արտադրության գործընթացները, չորեքշաբթի օրը երկօրյա հանդիպումը փակել են «տեքստային գործընթաց» սկսելու համաձայնագրով` առեւտրի կազմակերպության կանոնների բարդ համակարգի միջոցով COVID-19-ի դեմ պայքարի բարելավման առաջարկներ հավաքելու համար:
Նպատակը պատվաստանյութերի խիստ կարիք ունեցող զարգացող երկրներ հետաձգված մատակարարումների ջանքերն արագացնելն է։
Հաջորդ շաբաթ խմբի անդամների միջեւ կսկսվեն նոր ոչ ֆորմալ բանակցություններ՝ նպատակ ունենալով զեկույց պատրաստել ԱՀԿ դեսպանների հուլիսի 21-22-ը կայանալիք հանդիպման համար:
Հարավային Աֆրիկան եւ Հնդկաստանը հանդես են եկել անցյալ աշնանը COVID-19-ի դեմ պատվաստանյութերի, բուժումների եւ թեստերի արտոնագրային պաշտպանությունը ժամանակավորապես թուլացնելու առաջարկով: Թեեւ ուժեղ դեղագործական արդյունաբերություն ունեցող շատ զարգացած երկրներ կասկած ունեին այս գաղափարի հանդեպ կամ կտրականապես դեմ էին դրան:
Առեւտրի ներկայացուցչի խոսքով՝ երկու օրվա բանակցությունների ընթացքում Հարավային Աֆրիկան եւ Հնդկաստանը ներկայացրել են իրենց առաջարկի վերանայված տարբերակը, որին այժմ աջակցել են ավելի քան 60 երկրներ։ Դրանում նրանք պնդում են COVID-19-ի արտադրանքից երեք տարով ժամանակավոր հրաժարվելու անհրաժեշտությունը։
Բայց որոշ երկրներ, մասնավորապես Եվրամիության 27 անդամ պետությունները, ինչպես նաեւ Մեծ Բրիտանիան, Շվեյցարիան եւ Կորեան, շարունակում են դեմ լինել, ասել է պաշտոնյան:
Այնպիսի երկրներ, ինչպիսիք են Ավստրալիան, Բրազիլիան, Կանադան, Չինաստանը եւ ԱՄՆ-ը, դեռ լիովին չեն սատարել Հարավային Աֆրիկայի ու Հնդկաստանի առաջարկները եւ այն դիտարկում են որպես զարգացող աշխարհում COVID-19-ի արտադրանքի ավելի ընդգրկուն բաշխման մի մաս, ասել է պաշտոնյան:
Նույնիսկ լավատես կողմնակիցները խոստովանում են, որ մտավոր սեփականության իրավունքից հրաժարվելու վերջնական մշակման համար ամիսներ կպահանջվեն՝ դիմադրության եւ ԱՀԿ կանոնների պատճառով, որոնք պահանջում են կոնսենսուս այդպիսի որոշումների վերաբերյալ, ինչը նշանակում է, որ 164 անդամներից մեկ երկիր կարող է չեղարկել ցանկացած առաջարկ: Նույնիսկ եթե այն ընդունվի, վավերացումը նույնպես ժամանակ է պահանջում:
