Երկրի մարզերի, գյուղերի եւ քաղաքների բնակիչների հետ բազմաթիվ հանդիպումներ ուղղված են մարդկանց հուզող խնդիրների բացահայտմանը: Այս մասին Մեծամորի բնակիչների հետ հանդիպմանն ասաց ՀՀ երկրորդ նախագահ, «Հայաստան» դաշինքի առաջնորդ, ՀՀ վարչապետի թեկնածու Ռոբերտ Քոչարյանը:
«Իշխանությունը ստանձնելու նախապատրաստական աշխատանքներ են տարվում: Ժամանակ չկորցնեմ իրավիճակին ծանոթանալու համար»,- ասաց Քոչարյանը:
Նա նշեց գլոբալ խնդիրների երեք բլոկ` անվտանգություն, տնտեսություն, ներքին իրավիճակ: «Բոլոր երեք ոլորտներում էլ ճգնաժամ է: Կատարյալ փոթորիկ: Մենք նաեւ հասկանում ենք, թե ձեր օգնությամբ ինչ պատասխանատվություն ենք փորձում վերցնել մեր ուսերին»,- նշել է նախկին նախագահը` հավելելով, որ վստահ է դրանց ամրության հարցում:
«Բոլոր հանդիպումներին մեզ ասում են` պաշտպանեք երկիրը: Եթե երկիրը պաշտպանված չէ, մնացած բոլոր հարցերը հետին պլան են մղվում»,- շեշտեց նախկին նախագահը` հիշեցնելով, որ իշխանությունների գործողությունները տնտեսության անկման եւ բնակչության արտահոսքի հանգեցրին: Մենք չենք փորձելու բեւեռացնել հասարակությունը` փորձելով դիվիդենտներ ստանալ: Հակառակը, անհրաժեշտ է միավորել ժողովրդին, առանց դրա հնարավոր չի լինի տնտեսական աճ ապահովել, նշել է նա` հավելելով, որ դաշինքի նպատակն է անվտանգ եւ բարեկեցիկ ապագա ապահովել մարդկանց համար: