Վրաստանի արդարադատության նախարար Ռաթի Բրեգաձեն պարզաբանել է, թե ինչու Ուկրաինայի մարդու իրավունքների պաշտպան Լյուդմիլա Դենիսովային չեն թողել մտնել բանտի հիվանդանոց, որտեղ պահվում է բանտարկյալ Միխայիլ Սաակաշվիլին, տեղեկացնում է «Sputnik-Գրուզիա»-ն։
Սաակաշվիլին, որը հեռակա Վրաստանում դատապարտվել էր երկու քրեական գործով, հացադուլ է հայտարարել կալանավորման օրը՝ հոկտեմբերի 1-ին։ Նախկին նախագահը իրեն համարում է քաղբանտարկյալ, իսկ իր դեմ բոլոր մեղադրանքները՝ շինծու։
«Վրացական օրենսդրությունը չի նախատեսում (բանտի հիվանդանոց) Ուկրաինայի ժողովրդական պաշտպանի մուտքը, եւ նման անհրաժեշտություն չկա, մենք նման պարտավորություն չունենք։ Հետեւաբար, երբ բանտարկյալը բուժհաստատությունում է, մենք պարտավոր ենք առավելագույն չափով հոգալ նրա առողջության պահպանման համար։ Հենց այս դրդապատճառով էլ ժողովրդական պաշտպանին առայժմ չեն թողել»,- ասել է Բրեգաձեն մամուլի ասուլիսում։
Ընդ որում՝ նախարարը բացատրել է, թե ինչու մինչեւ հիմա չի հանդիպել Դենիսովայի հետ։
Նրա խոսքով՝ լավ կլիներ, եթե Ուկրաինայի մարդու իրավունքների պաշտպանը լսեր արդարադատության նախարարության դիրքորոշումը՝ Սաակաշվիլու հետ Ռուսթավի քաղաքի թիվ 12 բանտում վերջին հանդիպումից հետո միակողմանի հայտարարություններ անելուց առաջ։ Նախկին նախագահը Գլդանի (Թբիլիսի) թիվ 18 բանտի հիվանդանոց էր տեղափոխվել նոյեմբերի 8-ին։
«Լավ կլիներ, եթե մենք հանդիպեինք այն ժամանակ, եւ նա լսեր մեր դիրքորոշումը, եւ հաշվի առնվեր երկու կողմերի դիրքորոշումը»,- ասել է Բրեգաձեն։
Մինչդեռ, օմբուդսմենը շարունակում է պնդել, որպեսզի Սաակաշվիլին տեղափոխվի քաղաքացիական կլինիկա։ Նախկին նախագահի փաստաբանների հետ հանդիպումից հետո նա հայտարարել է, թե անհրաժեշտության դեպքում բանտի հիվանդանոցը չի կարողանա անհրաժետ բուժօգնություն ցուցաբերել։ Բացի այդ, Դենիսովայի խոսքով, Սաակաշվիլին ենթարկվում է կտտանքների։
«Շարունակվում է Սաակաշվիլու հոգեբանական եւ բարոյական ճնշումը»,- լրագրողներին ասել է Դենիսովան։
Նրա խոսքով՝ Սաակաշվիլուն թույլ չեն տալիս գիշերը լույսն անջատել։ Նա նաեւ ստիպված է ամենաբարձ ձայնով միացնել հեռուստացույցը, որպեսզի չլսի մյուս բանտարկյալների բացականչությունները։
