Սա արտառոց միջոցառում չէ, բազմաթիվ երկրներ կիրառում են թե տրանսպորտից, թե սննդի վայրերից օգտվելու ժամանակ հավաստված լինելու պատվաստված լինելու հանգամանքը: Այս մասին, այսօր՝ նոյեմբերի 30-ին, ԱԺ-ում լրագրողների հետ զրույցում նշեց Առողջապահության նախարար Անահիտ Ավանեսյանը՝ անդրադառնալով հունվարի 1-ից հանրային սննդի կետեր քաղաքացիները մուտքը միայն ՊՇՌ թեստի բացասական արդյունք կամ պատվաստված լինելու հավաստագիր ներկայացնելու դեպքում թույլատրելու նախաձեռնությանը:
Նա նշեց՝ համապատասխան կարգով սրճարաններ կամ ռեստորաններ քաղաքացիների մուտքը վերահսկելու տեխնիկական մեխանիզմները կան․ տեսչական մարմինն ու ոստիկանությունը վաղուց են վերահսկման գործառույթներ իրականացնում։ «Ասենք, Փարիզում մեր քաղաքացիները սրճարանից օգտվելիս նոյն կերպով հավելվածի միջոցով հավաստում են իրենց պատվաստված լինելու հանգամանքը: Այո, կովիդը անցանկալիորեն ստեղծել է ճնշումներ թե առողջապահական, թե տնտեսական համակարգերի վրա: Մեր կողմից կիրառվող միջոցառումներն էլ ուղղված են, որ կովիդով պայմանավորված իրավիճակը դուրս չգա կառավարելիության շրջանակներից, մենք չունենանք մարդկային ու տնտեսական կորուստներ: Իսկապես, մեր ջանքերը ուղղված է, որ զսպման մեխանիզմներով փրկենք մեր քաղաքացիների կյանքն ու առողջությունը, նաեւ տնտեսությունը»,-ասաց նա՝ հավելելով, որ դիմակ դնելու պահանջը դեռ արդիական է:
Նախարարին խնդրեցին արձագանքել նաև «Ռեստորանների ասոցացիայի» հայտարարությանը, որով կառավարությանն ու առողջապահության նախարարությանը կոչ է արվում զերծ մնալ քաղաքացիների մուտքը ռեստորաններ սահմանափակող նախաձեռնությունից։
«Ի՞նչ անդրադառնամ դրան։ Նախարարությունն իր լիազորությունների շրջանակում անելու է հնարավորը՝ պաշտպանելու քաղաքացիների առողջությունն ու կյանքը», - ասաց Ավանեսյանը:
Նա նշեց նաև՝ սահմանափակումները հունվարի 1-ից են կիրառում, որպեսզի պատվաստվածների թիվը շատ լինի. «Պատվաստման օրական ցուցանիշներն էլ ցույց են տալիս, որ արդեն իսկ այն չափով քաղաքացիներ են պատվաստվել, որ ինչ-որ լուրջ տնտեսական վնասներ չեն պատճառվի նաև հանրային սննդի օբյեկտներին, այլ հակառակը», - ասաց Ավանեսյանը։
