Հայ-ադրբեջանական սահմանի արևելյան ուղղությունում այսօր՝ հունվարի 11-ին, զոհված ժամկետային զինծառայող Ռուդիկ Ղարիբյանը Լոռու մարզի Ալավերդի քաղաքից էր: Նա բանակ էր զորակոչվել 2021 թվականի փետրվարի 14-ին: Ռուդիկը սովորել էր Ալավերդու պետական քոլեջի բանկային գործ բաժնում: Որպես կամավոր աշխատում էր «Վիքիմեդիա Հայաստան» հասարակական կազմակերպությունում:
«Իր նման մարդիկ շատ քիչ են մեր օրերում: Ռուդիկը բարի էր, մաքուր, կատակասեր էր, ու անկախ ամեն ինչից միշտ ժպտում էր: Սիրում էր լեռնագնացությամբ զբաղվել ու բացահայտումներ անել: Վերջին անգամ էլ Ախթալայի եկեղեցի էր գնացել ու ասաց, որ բանակից վերադառնալուց հետո Լենկ Թեմուրի լեռը կբարձրանա»,- NEWS.am-ի հետ զրույցում պատմեց Ռուդիկի ընկեր Լուսինե Օհանյանը:
Ռուդիկ Ղարիբյանն ուներ իրենից մեծ մեկ քույր:
Արցախյան 44-օրյա պատերազմից ավարտից մեկ օր անց՝ նոյեմբերի 10-ին, դեռեւս բանակ չզորակոչված Ռուդիկը ֆեյսբուքյան իր էջում այսպիսի գրառում էր կատարել․
«Պատերազմը չի ավարտվել ...
Յուրաքանչյուր հայ` մեծ ու մանուկ, կին, թե տղամարդ, ամեն մեկս զինվոր ենք:
Այս պատերազմը դարերի պատմություն ունի, որը պետք է ավարտվի մեր հաղթանակով: Հաղթանակ, որը կտրվի ոչ միայն զենքի, այլ նաև գիտելիքի ու միասնականության շնորհիվ:
Դիմում եմ աշակերտներին ու ուսանողներին: Այսուհետ սովորում ենք մեր առավելագույն ուժերի չափով, ոչ թե ուղղակի դիպլոմի կամ հետագալում աշխատանք ունենալու համար: Ուսուցչին/դասախոսին պիտի պահանջենք մեզ կրթել, մեզ կիրթ սերունդ է անհրաժեշտ:
Միջազգային մրցույթների առաջին հորիզոնականները մեր դրոշին են սպասում:
Հիշե՛ք, Հայաստանը դեռ շատ է ունենալու կրակի ճիշտ հաշվարկողների կարիք, շատ է ունենալու լավ բժիշկների, լավ շինարարների ու ճարտարապետների կարիք, լավ տնտեսագետների կարիք: Եվ այս ամենը կպսակվի հաջողությամբ, եթե չդադարենք մեր ներուժն ուղղել կրթելու և կրթվելու վրա:
Ես հավատում եմ քեզ՝ իմ հայ ազգի ներկայացուցիչ: Մենք կհանդիպենք տարիներ անց, մեր երկիրը շենացնելու ժամանակ:
Ու թե ամբողջ աշխարհն էլ գերեզման դառնա, մեկ է, վերջին ծաղիկ դնողը հայն է լինելու»։
Զորակոչվելուց օրեր առաջ էլ ֆեյսբուքյան իր էջում Ռուդիկը զինկոմիսարիատից ստացած ծանուցագիրն էր հրապարակել ու գրել․ «Գնում եմ, որ գամ։ Ժպիտով, միշտ ժպիտով»․․․
Հիշեցնենք, որ ժամը 15։15-ի սահմաններում Ադրբեջանի ԶՈՒ ստորաբաժանումները կրակ էին բացել Գեղարքունիքի մարզի Վերին Շորժայի հատվածում տեղակայված հայկական մարտական դիրքերի ուղղությամբ, ինչի հետևանքով մեկ զինծառայող ստացել է միջին ծանրության հրազենային վիրավորում։ Ժամը 17։30-ի սահմաններում ադրբեջանական ԶՈՒ ստորաբաժանումները վերսկսել էին կրակը հայ-ադրբեջանական սահմանի արևելյան ուղղությամբ տեղակայված հայկական դիրքերի ուղղությամբ, օգտագործելով նաև հրետանային միջոցներ և անօդաչու թռչող սարքեր։ Հայկական կողմը դիմել է համարժեք գործողությունների։
ՀՀ ՊՆ-ն հայտնել է, որ հայ-ադրբեջանական սահմանի արևելյան ուղղությամբ ադրբեջանական ստորաբաժանումների իրականացրած սադրանքի հետևանքով զոհվել են ՀՀ ՊՆ N զորամասի զինծառայողներ, շարքային Արթուր Արտյոմի Մխիթարյանը (ծնվ. 2002թ.) և կրտսեր սերժանտ Ռուդիկ Ռաֆիկի Ղարիբյանը (ծնվ. 2002թ.)։ Հայկական կողմն ունի նաեւ երկու վիրավոր, որոնց կյանքին վտանգ չի սպառնում։
