Թուրքիայի նախագահ Ռեջեփ Էրդողանը քրեական գործ է հարուցել գլխավոր ընդդիմադիր Ժողովրդահանրապետական ​​կուսակցության երկու պատգամավորների դեմ՝ «նախագահին վիրավորելու» մեղադրանքով, հայտնում է Diken-ը։

Պատգամավորներ Էնգին Օզքոչը եւ Այքութ Էրդողդուն մեղադրվում են հունվարի 14-ին հեռուստատեսային ծրագրի ժամանակ Թուրքիայի առաջնորդին վիրավորելու մեջ։ 

Թուրքիայի ոստիկանությունը կիրակի ձերբակալել է լրագրող Սեդեֆ Քաբաշին «նախագահին վիրավորելու» մեղադրանքով՝ TELE1 ցանցի նույն ծրագրի ժամանակ արված հայտարարության պատճառով։

Բողոքի համաձայն՝  պատգամավորների հայտարարությունները «խոսքի ազատության կատեգորիայի մաս չեն եւ հանդիսանում են վիրավորանք եւ անձնական իրավունքների խախտում»։

Երկուշաբթի օրը Թուրքիայի ԶԼՄ-ների վերահսկող մարմինը տուգանել է TELE1-ին Էրդողանին եւ նրա կառավարությանը քննադատող հաղորդման համար, հաղորդում է BBC Turkish-ը:

Թուրքիայի ՔՕ 299-րդ հոդվածի համաձայն՝ նախագահին վիրավորելը հանցագործություն է եւ ենթադրում է առավելագույնը չորս տարվա ազատազրկում։

299-րդ հոդվածի հետաքննություններն ու դատավճիռները կտրուկ աճել են 2014 թվականին Էրդողանի նախագահ դառնալուց հետո:

Արդարադատության նախարարության տվյալներով՝ 2010 թվականից ի վեր նախագահին վիրավորելու մեղադրանքով դատական ​​հայցերի թիվն աճել է 9000 տոկոսով։