Գերմանիայի նախագահ Ֆրանկ-Վալտեր Շտայնմայերը ստիպված է եղել չեղարկել երեքշաբթի՝ մարտի 29-ին նախատեսված այցը Լեհաստան՝ կորոնավիրուսի ՊՇՌ թեստի դրական պատասխանի պատճառով։ Այս մասին երկուշաբթի օրը հայտնել է պետության ղեկավարի գրասենյակը։

Նշվում է, որ երկուշաբթի օրը Շտայնմայերի ՊՇՌ թեստի պատասխանը կրկին դրական է եղել: Գերմանիայի նախագահը շատ է ափսոսում Լեհաստան իր այցի չեղարկման համար, քանի որ դա նրա համար կարեւոր էր։ Նախատեսվում էր, որ այցի ընթացքում Շտայնմայերը կհանդիպի Լեհաստանի նախագահ Անջեյ Դուդայի հետ, ինչպես նաեւ Կրակովում կմասնակցի 2020թ․ մարտին մահացած լեհ կոմպոզիտոր Քրիշտոֆ Պենդերեցկու հոգեհանգստի արարողությանը։ Բացի այդ, Գերմանիայի նախագահը նախատեսում էր այցելել Ուկրաինայից փախստականների ընդունման կենտրոն, ուր ցանկանում էր դեղորայք բերել որպես մարդասիրական օգնություն։

Մարտի 22-ին հայտնի է դարձել, որ 66-ամյա Շտայնմայերը եւ նրա կինը՝ Էլկե Բուդենբենդերը, վարակվել են կորոնավիրուսով։ Էքսպրես թեստի եւ ՊՇՌ թեստի պատասխանները դրական են եղել։ Նախագահն ու նրա կինը անմիջապես մեկուսացել են տանը։ Հիվանդությունը թեթեւ է ընթանում։