Իսրայելի հարվածները Սիրիայի տարածքին անընդունելի են, հայտարարել է ՌԴ նախագահի հատուկ բանագնաց Ալեքսանդր Լավրենտեւն Աստանայում բանակցությունների սկզբում, փոխանցում է «ՌԻԱ Նովոստի»-ն:
«Իհարկե, կքննարկենք Իսրայելի կողմից սիրիական տարածքի հաճախակիացած գնդակոծման հարցը։ Կարծում ենք, որ դրա վրա եւս պետք է շեշտադրում կատարել։ Դա անընդունելի է»,- ասել է Լավրենտեւը։
Նա հիշեցրել է, որ ավելի վաղ Դամասկոսի օդանավակայանի ուղղությամբ իսրայելական հարվածների արդյունքում վնասվել էր թռիչքուղին, ինչը թույլ չի տալիս միջազգային թռիչքներ ընդունել եւ ապահովել տարանցումը եւ ժամանումը Սիրիա։
Լավրենտեւը նաեւ հայտնել է, որ բանակցողները կքննարկեն նաեւ Սիրիայում ԱՄՆ ներկայության հարցը, որը զբաղվում է «սիրիական ազգային հարստության թալանով», ինչին պետք է «վերջ տալ»։
Հունիսի 15-16-ը Ղազախստանում տեղի են ունենում Սիրիայում կարգավորման հարցով «Աստանայի» գործընթացի երաշխավոր երկրների (Ռուսաստան, Թուրքիա, Իրան) բարձր մակարդակի բանակցությունները՝ սիրիական կառավարության եւ ընդդիմության ներկայացուցիչների, ինչպես նաեւ ՄԱԿ-ի մասնակցությամբ։
