Հայաստանի եւ Ադրբեջանի հարաբերությունների վերաբերյալ Թուրքիայի հայտարարությունները նախապայման չեն: Այս մասին հուլիսի 22-ին Ազգային ժողովում լրագրողների հետ հանդիպման ժամանակ ասաց ԱԺ արտաքին հարաբերությունների մշտական հանձնաժողովի նախագահ, իշխող «Քաղաքացիական պայմանագիր» կուսակցության պատգամավոր Էդուարդ Աղաջանյանը։
Ավելի վաղ Թուրքիայի արտգործնախարար Մեւլութ Չավուշօղլուն ասել էր, որ Հայաստանը պետք է ցուցադրի իր ձգտումը խաղաղությանը՝ կոնկրետ քայլեր ձեռնարկելով Զանգեզուրի նախագծի վերաբերյալ եւ համապարփակ խաղաղության պայմանագիր կնքելով Ադրբեջանի հետ:
«Կարծում եմ, որ ձեր նշած հայտարարությունը, այնուամենայնիվ, նախապայման չէ։ Թուրքիան միշտ նույն դիրքերից է հանդես եկել, եւ մեզ համար, իհարկե, դա երբեք ընդունելի չի եղել»,- ասաց Աղաջանյանը։
Հայկական կողմը, ինչպես նշեց Աղաջանյանը, միշտ ասել է, որ Անկարայի հայտարարությունների եւ գործողությունների միջեւ տարբերություններ կան: «Մեր նպատակներից մեկն այդ տարբերությունը վերացնելը կամ գոնե նվազագույնի հասցնելն է։ Իսկ Հայաստանի դիրքորոշումը չի փոխվել, եւ այս հարցում որեւէ նախապայման անընդունելի է»,- ընդգծեց նա։
