Նախագահ Ջո Բայդենը հայտարարել է, որ Իրանի հետ 2015 թ․ կնքված միջուկային համաձայնագիրը «մեռած է», սակայն ընդգծել է, որ ԱՄՆ-ը պաշտոնապես չի հայտարարի դա։ Սոցցանցերում հայտնված նոր տեսանյութի համաձայն՝ նա այդ մասին ասել է նոյեմբերի 4-ին նախընտրական հանրահավաքի կուլիսներում, գրում է Axios-ը։
Այս պահին սա ամենահամոզիչ հաստատումն է այն բանի, որ Բայդենի վարչակազմը կարծում է, որ Իրանի հետ գործարքի համար ոչ մի հետագա ուղի չկա, եւ դա թողնում է Թեհրանի միջուկային ծրագրի ապագայի վերաբերյալ առանցքային հարցերը:
Հոկտեմբերի վերջին Իրանի հարցով ԱՄՆ հատուկ ներկայացուցիչ Ռոբ Մալլին ասել էր, որ վարչակազմը չի պատրաստվում «ժամանակ վատնել»՝ փորձելով վերականգնել իրանական միջուկային համաձայնագիրը այս պահին՝ հաշվի առնելով Թեհրանի կողմից ցուցարարների նկատմամբ ճնշումները, Ուկրաինայում Ռուսաստանի պատերազմին Իրանի աջակցությունը եւ միջուկային ծրագրի հանդեպ Իրանի դիրքորոշումը։
Բայդենն այս կարծիքը հայտնել է Կալիֆոռնիայի Օուշանսայդ քաղաքում նախընտրական հանրահավաքին մասնակցող մի կնոջ հետ կարճ զրույցի ժամանակ:
Կինը խնդրել է Բայդենին հայտարարել, որ Գործողությունների համատեղ համապարփակ ծրագիրը (ԳՀՀԾ) մեռած է: Բայդենը պատասխանել է, որ դա տեղի չի ունենա «շատ պատճառներով»։ Բայց հետո հավելել է. «Նա մեռած է, բայց մենք չենք պատրաստվում այդ մասին հայտարարել։ Երկար պատմություն է»։
«ԳՀՀԾ-ն այժմ մեր ուշադրության կենտրոնում չէ։ Դա օրակարգում չկա»,- Axios-ին ասել է Սպիտակ տան Ազգային անվտանգության խորհրդի ներկայացուցիչը: «Մենք չենք տեսնում, որ շուտով պայմանավորվածություն ձեռք կբերվի»,- ասել է նա։
