Հունաստանի վարչապետ Կիրիակոս Միցոտակիսը հեռախոսազրույց է ունեցել Թուրքիայի նախագահ Ռեջեփ Թայիփ Էրդողանի հետ։ Այս մասին հաղորդվում է Հունաստանի կառավարության կայքում, փոխանցում է Sputnik-ը։
Սա Հունաստանի կառավարության ղեկավարի եւ Թուրքիայի ղեկավարի առաջին հեռախոսազրույցն է 2022 թվականի մայիսին երկու երկրների հարաբերությունների վատթարացումից հետո։ «Վարչապետն իր վշտակցությունն է հայտնել Թուրքիայում տեղի ունեցած ավերիչ երկրաշարժի կապակցությամբ, Էրդողանին է փոխանցել Հունաստանի կառավարության եւ ժողովրդի ցավակցական խոսքերը զոհերի կապակցությամբ»,- ասվում է հաղորդագրության մեջ։
Միցոտակիսը հաստատել է բնական աղետի հետեւանքները հաղթահարելու համար Թուրքիային անհապաղ հնարավոր բոլոր օգնությունները ցուցաբերելու Հունաստանի պատրաստակամությունը։
«Էրդողանը շնորհակալություն է հայտնել վարչապետին աջակցության եւ անհապաղ օգնության համար»,- տեղեկացնում է լրատվամիջոցը։
Հիշեցնենք, որ Էրդողանը 2022 թվականի մայիսին հրաժարվել էր շփվել Միցոտակիսի հետ։ Թուրքիայի նախագահն ասել էր, որ Հունաստանի վարչապետը խախտել է մարտին իրենց հանդիպման ժամանակ ձեռք բերված պայմանավորվածությունները, եւ այսուհետ իր համար Միցոտակիս քաղաքական գործիչ չկա։
Ավերիչ երկրաշարժը տեղի է ունեցել փետրվարի 6-ի գիշերը։ Երկրորդ հզոր ցնցումը գրանցվել է ցերեկը։ 7,7 մագնիտուդով առաջին եւ 7,5 մագնիտուդով երկրորդ երկրաշարժերի միջեւ ընկած ժամանակահատվածում Թուրքիայում տեղի է ունեցել մոտ 78 ցնցում։
