Ատոմային էներգիայի միջազգային գործակալությունը (ԱԷՄԳ) հայտնաբերել է, որ Իրանը 18 անգամ ավելի շատ հարստացված ուրան ունի, քան նախատեսված է միջուկային համաձայնագրով։ Այս մասին, վկայակոչելով ԱԷՄԳ-ի հաշվետվությունը, տեղեկացրել է AFP գործակալությունը։

Գործակալության տվյալներով՝ Իրանում հարստացված ուրանի ընդհանուր քանակությունը ներկայում կազմում է 3,76 տոննա՝ առավելագույն թույլատրելի 202,8 կիլոգրամի փոխարեն։ ԱԷՄԳ-ի տեսուչներն Իրանի միջուկային օբյեկտում հայտնաբերել են նաեւ ուրանի մասնիկներ, որոնք հարստացված են ռեկորդային՝ 83,7 տոկոսով, ինչը գրեթե բավական է միջուկային ռումբի արտադրության համար։ Միջուկային զենքի ստեղծման համար պահանջվում է 90 տոկոսանոց հարստացում, գրել է AFP-ն։

Ինչպես նշված է հաշվետվությունում, ԱԷՄԳ-ն եւ Իրանը դեռեւս քննարկում են, թե որտեղից են առաջացել այդ մասնիկները։ Թեհրանը ժխտում է 60 տոկոսից ավելի հարստացումը՝ վկայակոչելով «ոչ միտումնավոր տատանումները» հարստացման պրոցեսում։ ԱԷՄԳ-ն քանիցս մեղադրել է Թեհրանին ուրանի հարստացումն արագացնելու մեջ։

Իրանը մինչ այդ մերժում էր պնդումներն այն մասին, որ ուրանի հարստացման մակարդակը երկրում հասցվել է 84 տոկոսի։ Իսլամական հանրապետության Ատոմային էներգիայի կազմակերպության պաշտոնական ներկայացուցիչ Բեհրուզ Քամալվանդին այդ տեղեկություններն անվանել է «փաստերի աղավաղում»։ Թեհրանն առայժմ «ուրանը 60 տոկոսից ավելի հարստացնելու փորձեր չի ձեռնարկել», ասել է նա։