Բրիտանիայի կենդանաբանական այգում սատկել է աշխարհի ամենածեր Հումբոլդտի պինգվինը, գրել է Daily Star-ը։ Այգու աշխատակիցների խոսքով, եթե թռչունը մի փոքր էլ ապրեր՝ կհասներ իր 33-ամյակին։
Ռոզի անունով պինգվինը Սյուերբի Հոլ կենդանաբանական այգու գլխավոր աստղն էր, նա այստեղ էր հայտնվել 4 ամսականում։ 33 տարի թռչունն ուրախացրել է այցելուներին, նա սատկել է քնի մեջ, մարտի 10-ին։ Այգու աշխատակիցները նշել են, որ կենդանին իրենց մոտ է հայտնվել 1990թ. «զուգընկերոջ»՝ Դիոնի հետ։
«Մենք բոլորս ասես դատարկված լինենք Ռոզիի կորստով։ Ես ինքս նրա հետ եմ չորս ամսականից, եւ մենք միասին 32 տարի ենք անցկացրել։ Մենք բոլորս կփնտրենք նրան»,- ասել է այգու աշխատող Ջոն Փիկերինգը։
Այս տարիների ընթացքում Ռոզին եւ Դիոնը բազմաթիվ սերունդներ են տվել, որոնք դեռ կենդանաբանական այգում են։ Մասնագետների խոսքով՝ Հումբոլդտի պինգվինները խոցելի են եւ կարող են ոչնչանալ վայրի բնության մեջ՝ կլիմայի փոփոխությունների եւ այլ պատճառով։
Այս տեսակի կյանքի տեւողությունը վայրի բնության մեջ կազմում է 15-20 տարի։