Հայաստանի եւ Իրանի միջեւ խորհրդակցությունները բավականին ինտենսիվ են առաջ ընթանում թե ԱԳ նախարարների, թե ԱԳՆ-ների միջեւ խորհրդակցությունների մակարդակով: Այս մասին, այսօր՝ մարտի 22-ին, լրագրողների հետ զրույցում նշեց Հայաստանի ԱԳ փոխնախարար Վահան Կոստանյանը:
«Սա մեծապես պայմանավորված է այն հանգամանքով, որ հայ-իրական օրակարգը վերջին տարիներին ընդլայնվել է եւ ԱԳՆ-ները կոչված են օգնելու սպասարկել այդ օրակարգը, որը բավականին մեծ է: Այն իր մեջ ներառում է թե տնտեսական բազմաթիվ ծրագրեր, որոնք փորձում ենք կյանքի կոչել համատեղ ուժերով, թե փորձում ենք միմյնց ավելի ընկալելի դարձնել դիրքորոշումները միջազգային եւ տարածաշրջանային անվտանգության հետ կապված: Այս առումով անհրաժեշտ է, որ խորհրդակցությունները չընդհատվեն, պարբերական լինեն»,-ասաց նա:
ԱԳ փոխնախարարն ընդգծեց, որ իրանցի գործընկերոջ հետ քննարկումներում անդրադարձ է կատարվել հայ-իրանական ամբողջ օրակարգին, այդ թվում տարածաշրջանային անվտանգության հարցերին:
«Գիտեք, որ հատկապես վերջին օրերի ընթացքում ԱԳՆ-ն նաեւ իր կողմից տարածված հաղորդագրությունների միջոցով ներկայացնում է այն իրավիճակը, որ ստեղծվել է տարածաշրջանում եւ Ադրբեջանի սադրիչ գործողությունների փորձերը, որոնք միտված են էլ ավելի ապակայունացնել իրավիճակը Հարավային Կովկասում, Լաչինի միջանցքի ապօրինի շրջափակումը, եւ այս ամբողջը հանգամանալից կերպով ներկայացվել է մեր իրանցի գործընկերներին»,-ընդգծեց Կոստանյանը:
Անդրադառնալով Իրանի հետ ռազմական համագործակցության հեռանկարներին, ԱԳ փոխնախարարն ասաց. «Մենք այս պահին կենտրոնանում ենք այն օրակարգի վրա, որը ունենք Իրանի հետ»:
