ՄԱԿ-ի Անվտանգության խորհուրդը չի աջակցել Չինաստանի, Բելառուսի, Վենեսուելայի, ԿԺԴՀ-ի, Նիկարագուայի, Սիրիայի եւ Էրիթրեայի հետ համատեղ Ռուսաստանի առաջարկած բանաձեւին, որում առաջարկվում է միջազգային հետաքննություն սկսել 2022 թվականի սեպտեմբերին Բալթիկ ծովի հատակով Ռուսաստանից Գերմանիա անցնող «Հյուսիսային հոսք» գազատարներում տեղի ունեցած պայթյունների վերաբերյալ, հաղորդում է «Ամերիկայի ձայնը»։
Արեւմտյան երկրները անցյալ տարվա սեպտեմբերին Բալթիկ ծովի հատակին տեղի ունեցած պայթյունների պատասխանատվությունը բարդել են Ռուսաստանի վրա, սակայն Կրեմլը Արեւմուտքին մեղադրել է սաբոտաժի մեջ:
Անվտանգության խորհրդի երեք անդամները՝ Ռուսաստանը, Չինաստանը եւ Բրազիլիան, կողմ են քվեարկել, մնացած 12 երկրները ձեռնպահ են մնացել: Բանաձեւի ընդունման համար անհրաժեշտ է Անվտանգության խորհրդի անդամների առնվազն ինը ձայն, եւ որ Անվտանգության խորհրդի ոչ մի մշտական անդամ վետո չդնի դրա վրա:
Գերմանիան, Դանիան եւ Շվեդիան շարունակում են գազատարների պայթյունների վերաբերյալ ազգային հետաքննությունները: Հենց այդ հետաքննություններն էլ անվտանգության խորհրդի շատ անդամների համար պատճառ են դարձել՝ ձեռնպահ մնալու քվեարկությունից։ Մի քանի երկրների ներկայացուցիչներ, ելույթ ունենալով նիստում, բացատրել են, որ անհրաժեշտ են համարում նախ ավարտին հասցնել այդ ազգային հետաքննությունները:
Ռուսաստանը սկսել է ՄԱԿ-ում առաջ մղել իր բանաձեւը ամերիկացի լրագրող Սեյմուր Հերշի հետաքննության հրապարակումից հետո, որն իր հոդվածում պնդել է, թե անցյալ տարվա սեպտեմբերին «Հյուսիսային հոսքերում» պայթեցումների հետեւում, իբր, կանգնած է ԱՄՆ-ն։ Հերշի հոդվածը հիմնված է անանուն աղբյուրների տվյալների վրա եւ հրապարակվել է առանց որեւէ պաշտոնական արեւմտյան լրատվամիջոցի աջակցության։