Մեծ առումով Վաշինգտոնում տեղի ունեցած բանակցությունները ցույց տվեցին, որ որեւէ արդյունք չի եղել: Այս մասին այսօր՝ մայիսի 8-ին, Հակակոռուպցիոն դատարանի դիմաց այսօր լրագրողների հետ զրույցում ասաց ԱԺ «Պատիվ ունեմ» խմբակցության քարտուղար Տիգրան Աբրահամյանը:

«Որքան էլ ամերիկյան կողմը փորձում էր դրական ֆոն ստեղծել այդ բանակցությունների եւ դրանց արդյունքի շուրջ, իրականում դրան հաջորդած ժամանակաշրջանում Ադրբեջանից, Թուրքիայից, Հայաստանից հնչած մեկնաբանությունները ցույց են տալիս, որ ոչ միայն ռեալ արդյունք չի եղել, այլեւ կողմերը որոշակի զգուշավորությամբ խոսում էին նոր հնարավոր , անկանխատեսելի իրադարձությունների մասին։

Փաստացի այսօր ունենք մի իրավիճակ, երբ Ադրբեջանը Հայաստանի գլխին իջեցրել է բավականին մաքսիմալիստական օրակարգ, որը ենթադրվում է  ոչ միայն Արցախի հանձնումը Ադրբեջանին։ Նիկոլ Փաշինյանը մի քանի օր առաջ խոսում էր այն մասին, որ հայկական կողմի առաջարկած նույնիսկ ինքնավարությունը Ադրբեջանը չի ընդունում։ Ադրբեջանի մյուս պահանջները վերաբերում են Հայաստանի Հանրապետությանը՝  Ադրբեջանի գրաված տարածքների լեգիտիմացում, նոր տարածքներ, որոնք չեն սահմանափակվում բացառապես այդ 8 գյուղերով»,-հայտարարեց ընդդիմադիր պատգամավորը:

Նա հավելեց, որ վերջին օրերին նաեւ միջանցքի թեման է ակտիվ շրջանառվում. «Ադրբեջանը չի էլ փորձում թաքցնել, որ դրան հասնելու է ամեն գնով՝ նաև ուժի կիրառման միջոցով: Ադրբեջանի այս պահանջների աճը ցույց է տալիս ՀՀ արտաքին քաղաքականության տապալումները: Եթե մինչ այդ փորձում էին հնրությանը հրամցնել, որ Արցախի հանձնմամբ Հայաստանի  նվտնգության հարցն ենք լուծում, կյանքը, ժամանակը եւ պատմությունը ցույց տվեց, որ Արցախը ընդամենը դարպաս է դեպի Հայաստան եւ միայն Արցախով Ադրբեջանը չի փորձելու սահմանափակվել: Առաջիկայում սպասվում են նոր ծանր իրադարձություններ: ՀՀ իշխանությունն ունակ չէ, չունի համապատասխան կամք ոչ միայն արտաքին անվտանգության մարտահրավերներին դիմակայելու, այլ  իր քայլերով բարենպաստ դաշտ է ձեւավորում Ադրբեջանի նոր ագրեսիայի համար»,-ասաց նա։

Հիշեցնենք, որ Հակակոռուպցիոն դատարանում մեկնարկել են ՀՀ պաշտպանության նախկին նախարար Սեյրան Օհանյանի, ՀՀ պաշտպանության նախարարության N զորամասի նախկին հրամանատար Գրիգորի Խաչատուրովի և ևս 11 անձի վերաբերյալ քրեական գործը։