Էրդողանի աքիլլեսյան գարշապարը երկրի տնտեսական իրավիճակն է եւ դրա ազդեցությունը բնակչության աղքատ խավի վրա։ Պատահական չէ, որ Էրդողանը կոսմետիկ միջոցներ է ձեռնարկում մարդկանց աչքերին թոզ փչելու համար։ Այս մասին NEWS.am-ի հետ զրույցում ասաց Արցախի ԱԳ նախկին նախարար Կարեն Միրզոյանը։
Թուրքիայում ընտրություններից հետո, նրա գնահատմամբ, ազգային արժույթի արժեզրկման նոր ալիք է սպասվում։ Ընդդիմությունը հենց այդ ուղղությամբ էլ նախընտրական քարոզչություն է իրականացնում։
«Այո, Էրդողանը լավ հռետոր է, բայց հանրությունը հոգնել է նրանից, հատկապես երիտասարդությունը, որն այնքան էլ նվիրված չէ իշխանությունների կողմից սերմանվող իսլամական գաղափարախոսությանը։ Տնտեսությունից հետո ընտրողների համար երկրորդ կարեւոր հարցը երկրի ապագան է։ Ընթացիկ գծի շարունակությունը, որի մասին խոսում է Էրդողանը, մարդկանց չի գոհացնում»,-նշեց նա։
Նույնիսկ Էրդողանի իշխանության պահպանման դեպքում Թուրքիան, ինչպես կարծում է նախկին նախարարը, միեւնույն է, տուրբուլենտ վիճակում կլինի։
«Բացի այդ, Էրդողանը ստիպված կլինի սկսել խորհրդարանն իրեն ենթարկեցնելու գործընթաց, ինչը կհանգեցնի հասարակական դիմադրության եւ կարող է գլխացավանք դառնալ գործող նախագահի համար»,-ընդգծեց նա:
Միրզոյանը չբացառեց, որ քաղաքական գործընթացներին կարող են միջամտել եւ՛ իշխանության, եւ՛ ընդդիմության կողմից։
«Ամեն դեպքում Թուրքիայում ընտրությունների արդյունքները խորքային ազդեցություն կունենան երկրում հետագա գործընթացների վրա»,-եզրափակեց նա:
