Եթե անկլավները տանք Ադրբեջանին, մեր ճանապարհները փակվում են դեպի Իրան եւ Վրաստան, իրենք կարող են հսկողության տակ պահել մեր ճանապարհները, ինչո՞ւ պետք է տանք: Այս մասին «Civilnet.am-ին տված հարցազրույցում նշել է Ռուսաստանի հայերի միության նախագահ Արա Աբրահամյանը:
Նրա խոսքով, իշխանություններն այս 5 տարում ոչինչ չեն արել. «Մենք պետք է հիմա ունենայինք ամենալավ բանակներից մեկը՝ Հայաստանի եւ Սփյուռքի ունեցած հնարավորությունների սահմաններում: Հայաստանի առաջին երեք նախագահների ժամանակ մենք բոլորս մասնակցում էինք բանակցություններին, մենք տալիս էինք փորձագետներ: Հիմա այնպիսի տպավորություն է, որ ինչ-որ մեկը վերցրել է ամբողջ մի պետություն, Սփյուռք, Արցախ եւ որոշում է կայացնում: Այդ որոշումներից մեր վիճակն անընդհատ վատանում է: Մեզ անընդհատ վախեցնում է, ինքն ավելի շատ է վախեցնում, քան Ալիեւը»,-ասել է Արա Աբրահամյանը:
Նա համոզմունք հայտնեց, որ Հայաստանի ղեկավարությունը չպետք է պատճառներ փնտրի՝ արդարացնելու համար ներկայիս վիճակը, եւ պետք է ամեն ինչ անել բանակը հզորացնելու համար․
Արա Աբրահամյանն անընդունելի է համարում սպառազինություն չունենալու կամ դրա մատակարարումների հետ կապված ՀՀ իշխանությունների բացատրությունները. «Եթե ես Հայաստանի վարչպետն եմ, ունեմ հայրենիք, եթե Ռուսաստանը զենք չի տալիս, ես պետք է գնեմ բոլոր տեղերից: Ինքը պետք է ասի, ռուսաստանը չտվեց, մենք գնում ենք Հնդկլաստանից ենք առնում, ԱՄՆ-ից ենք առնում, Եվրոպայից ենք առնում: Մենք պետք է ունենանք բանակ: Ինքը պետք է գա, Ռուսաստանին ճիշտ ձեւով բացատրի, որ ինքը մենակ զենք է առնում, Ռուսաստանի շհերին չի կպնում: Եթե ես լինեի, զենք կգնեի բոլորից՝ ԱՄՆ-ից, Եվրոպայից, Թուրքիան էլ եթե զենք վաճառեր, նրանից էլ կգնեի»,- նշել է Արա Աբրահամյանը:
