Armenian Weekly-ի լրագրող Գեղամ Բալյանը հայտնել է Երուսաղեմի հայկական թաղամասում ապօրինի շինարարության հերթական դեպքի մասին։
Նրա խոսքով՝ XANA Capital ընկերության աշխատակիցները քանդել են Երուսաղեմի Հայոց պատրիարքությանը պատկանող պատի եւս մեկ հատված։ «Մի խումբ հայ խաղաղ բնակիչներ և հոգևորականներ հավաքվել էին տեղում՝ կանխելու բուլդոզերի կողմից պատի հետագա ոչնչացումը»,- գրել է նա իր X միկրոբլոգում։
Անօրինական գործունեության աճի և լիակատար անպատժելիության պատճառով նորաստեղծ @SavetheArQ շարժումը, որի նպատակն է պաշտպանել և պահպանել Երուսաղեմի հայկական թաղամասը, Թաթոյան հիմնադրամի և Քերքոնյան Դաջանիի հետ համագործակցությամբ, բարերար Ջեք Յուրեջյանի և այլոց ֆինանսական աջակցությամբ, դատական հայց է ներկայացրել ընդդեմ ընկերության:
Շարժման հայտարարության մեջ նշված է.
«2023 թվականի հոկտեմբերի 30-ին մեր փաստաբանական թիմը հայց է ներկայացրել Xana Gardens իսրայելական զարգացման ընկերության, Երուսաղեմի քաղաքապետարանի, Հայոց պատրիարքարանի և «Կովերի պարտեզի» գործով այլ մեղադրյալների դեմ։ Գործը ներկայումս գտնվում է Իսրայելի դատարաններում։
Չնայած մենք ավելի վաղ մտադրություն ունեինք գործը հարուցելու, սակայն տարածաշրջանում ստեղծված ծանր իրավիճակը հետաձգեց գործընթացը։ Նմանատիպ գործողություններ են իրականացվել նաև օտարերկրյա իրավասությունների համապատասխան կողմերի նկատմամբ։
Դատական փաստաթուղթն անդրադառնում է Հին քաղաքի հայկական թաղամասում գտնվող նշանակալի գույքի հետ կապված մտահոգություններին: Դրա հիմնական նպատակն է ապահովել հայ համայնքի անդամների մուտքի և օգտագործման հիմնական իրավունքները:
Հարկ է նշել, որ, ըստ Պատրիարքարանի հավաստի աղբյուրների, նամակ է ուղարկվել կառուցապատող ընկերությանը՝ նախագիծը չեղարկելու մասին։
Այս նախաձեռնության հաջողությունը կարելի է վերագրել SavetheArQ շարժմանը, որը հսկայական ճնշում գործադրեց Պատրիարքարանի վրա՝ չեղյալ համարելու այս վիճելի համաձայնագիրը: Բացի այդ, հայկական իրավաբանական թիմի մասնակցությունը հնարավորություն տվեց երրորդ անձանցից ստանալ պայմանագիրը և այլ համապատասխան տեղեկատվություն, ինչը հանգեցրեց դատական գործերի նախապատրաստման համար պրոֆեսիոնալ իրավաբանների տեղական թիմի ներգրավմանը:
Շարժումը մեկ անգամ ևս ցույց տվեց իր արդյունավետությունն ու նվիրվածությունը հայ համայնքի իրավունքների պաշտպանությանը, Հայոց պատրիարքարանի, հայկական թաղամասի և Սուրբ Երկրում ներկայության պահպանմանը։
Հասարակության և հոգևորականության ներկայացուցիչների երեկվա համախմբվածությունը՝ կասեցնելու կառուցապատող ընկերության ապօրինի շինարարությունը, ապացուցեց, որ հաջողության հասնելու միակ ճանապարհը ուժերը միավորելն է։ Ուստի մենք կոչ ենք անում Պատրիարքարանին սերտորեն համագործակցել հասարակության և շարժման հետ՝ միասնական ճակատով լուծելու այս ճգնաժամը։
Մեր պայքարն արդար է, և մենք պայքարելու ենք մինչև վերջ»։