Արեւմուտքը մի շարք պայմաններ է դրել Հայաստանի առջեւ, ընդ որում՝ վաղուց։ Հայաստանի ներկայիս իշխանությունները կատարում են այս պայմանները, և ՀԱՊԿ-ի շուրջ ստեղծված իրավիճակը տեղավորվում է այս տրամաբանության մեջ։ Այս մասին NEWS.am -ի թղթակցի հետ զրույցում ասաց քաղաքական վերլուծաբան Արգիշտի Կիվիրյանը։
Նրա խոսքով` Արևմուտքը ձգտում է դուրս բերել Ռուսաստանին տարածաշրջանից և թույլ չտալ Իրանի մուտքն այստեղ, ՀԱՊԿ-ի շուրջ վերջին զարգացումները հենց դրա հետ են կապված։
«ՀԱՊԿ առաքելությունը, եթե այն կայանար, Հայաստանին ոչ մի վնաս չէր բերի։ Ավելին, դա կհավասարակշռեր ԵՄ դիտորդների ներկայությունը։ Հայաստանի իշխանություններն ասում են, որ ՀԱՊԿ-ից Երևանի դուրս գալու հարց օրակարգում չկա, բայց դա չի նշանակում, որ այն չի կարող առաջանալ։ Ամեն ինչ կախված կլինի տարածաշրջանում և աշխարհում տեղի ունեցող զարգացումներից։ Եթե Ռուսաստանը թուլանա, ապա Երևանը կարող է դուրս գալ ՀԱՊԿ-ից և Մոսկվայի հետ կապված այլ կազմակերպություններից»,- հավելեց նա։
Ընդ որում, Հայաստանին ոչ ոք այլընտրանքային անվտանգության բարձիկ չի առաջարկում, նշել է Կիվիրյանը։
«Հայաստանի իշխանություններն էլ են դա հասկանում, ուղղակի թքած ունեն, քանի որ ձգտում են միայն իրականացնել իրենց ծրագրերը։ Այս կողմից այն կողմ նետվելն արդեն հանգեցրել է Արցախի լիակատար կորստին, Արցախի հայաթափմանը և Հայաստանի գլխին կախված սպառնալիքին, որը ոչ մի կերպ չի վերացվում։
Ո՛չ ՆԱՏՕ-ն, ո՛չ ԱՄՆ-ը որպես առանձին սուբյեկտներ իրենց օրակարգում չեն ներառել Հայաստանին անվտանգության երաշխիքներ տրամադրելու հարցը։ Ադրբեջանն իր էներգետիկ ռեսուրսներով Արևմուտքի համար կշեռքի վրա ավելի ծանր դուրս եկավ, քան հայ ժողովրդի շահերը, ուստի, իր հարցերը լուծեց պարտվող հայկական կողմի հաշվին»,- նշեց փորձագետը։
Նա վստահ է, որ Արևմուտքը պարզապես ցանկանում է Հայաստանի ձեռքով հասնել տարածաշրջանից Ռուսաստանի և Իրանի դուրսբերմանը, իսկ հետո, առանց աչք թարթելու, կզոհաբերի Հայաստանը, ինչն արեց Արցախի հետ։
«Բայց եթե Արցախում լինեին, ասենք, ուրանի հանքեր կամ նավթի հանքեր, ապա ակնթարթորեն կհայտնվեին առնվազն 10 երկիր, որոնք կհայտնեին իրենց պատրաստակամությունը պաշտպանելու Հանրապետությունը»,- եզրափակեց Կիվիրյանը։