Ռուս-հայկական հարաբերությունները ճգնաժամի մեջ են, պատճառը ոչ միայն և, գուցե, ոչ այնքան Երևանի դիրքորոշման մեջ է, որը փոխվեց 2018 թվականի հեղափոխությունից հետո։ Այս մասին NEWS.am-ի թղթակցի հետ զրույցում ասել է քաղաքագետ Ալեքսանդր Իսկանդարյանը։
Նա նշել է, որ Ռուսաստանի ազդեցությունը Հայաստանում 2018 թվականից հետո սկզբում մեծացել էր, սակայն այժմ նվազում է։
«Բավական հին իրավիճակ է. հայ-ռուսական հարաբերություններում ճգնաժամերը միշտ էլ ծագել են՝ հայ-ռուսական հարաբերությունների հենց սկզբից։ Կարելի է հիշել Ադրբեջանին զենք վաճառելը, 2013 թվականի պատմությունը՝ միջազգային պայմանագրերի, կազմակերպությունների և այլնի առնչությամբ Հայաստանի վարքագծի կտրուկ փոփոխություններով հանդերձ։ Պարզապես այդ ամենն այն ժամանակ ավելի քիչ էր հայտնվում մամուլում։ Թե՛ Ռուսաստանը, թե՛ Հայաստանն այս առումով տարբեր էին, ամեն ինչ որոշվում էր փակ սենյակներում։ Հիմա, ելնելով Հայաստանի ներկայիս քաղաքական վերնախավի առանձնահատկություններից, շատ բաներ, որոնք նախկինում տեղի էին ունենում փակ դռների հետևում, տեղի են ունենում բաց։
Սա, սակայն, լրջորեն չի փոխում իրավիճակը։ Իրավիճակը փոխում է ռուս-ուկրաինական պատերազմը և այն, որ այս պատերազմի արդյունքում ռուսական արտաքին քաղաքականության որոշ կառույցներ և գործիքներ պարզապես դադարում են գործել։ Օրինակ՝ ՀԱՊԿ-ը։
ՀԱՊԿ-ի ներսում հարաբերությունները բարդանում են ոչ միայն Հայաստանի գործողությունների պատճառով, թեև դրանք կան»,- ընդգծել է փորձագետը՝ հիշեցնելով ՀԱՊԿ նախկին գլխավոր քարտուղար Խաչատուրովի դատավարությունը։
Նրա կարծիքով՝ Ռուսաստանը ո՛չ հնարավորություն ունի, ո՛չ էլ ցանկություն լրջորեն ներգրավվելու հարավկովկասյան հարցերում։
«Հայաստանը փորձում է ինչ-որ կերպ դա փոխարինել այլ գործընկերներով։ Միևնույն ժամանակ, Երևանում այնքան էլ լավ չեն պատկերացնում, թե ինչպես է աշխատում Եվրամիությունը»,- նշել է Իսկանդարյանը։
Նրա խոսքով՝ ստեղծված իրավիճակն Ուկրաինայի շուրջ տեղի ունեցող գործընթացների հետեւանք է։
