Երկուշաբթի օրը Թավրիզ քաղաքում տեղի կունենա Իրանի նախագահ Էբրահիմ Ռաիսիի ուղղաթիռի կործանման հետեւանքով զոհվածների հիշատակի արարողությունը։ Այս մասին հայտնում է IRIB հեռուստաալիքը։

Դրա տվյալներով՝ ավիավթարից զոհվածների մարմիններն արդեն հասցվել են Թավրիզ, որտեղ տեղի ժամանակով՝ ժամը 16:00-ին, կսկսվի հիշատակի արարողությունը, իսկ հաջորդ օրը քաղաքի բնակիչներին հնարավորություն կտրվի անձամբ հրաժեշտ տալ մահացած նախագահին։

Մայիսի 19-ին Իրանի Արևելյան Ադրբեջան նահանգում Իրանի նախագահին տեղափոխող ուղղաթիռ է կործանվել։ Ուղղաթիռում էին նաև Իսլամական Հանրապետության արտաքին գործերի նախարար Հոսեյն Ամիր Աբդոլլահյանը, Արևելյան Ադրբեջանի նահանգի նահանգապետ Մալեք Ռահմատին և Թավրիզի ուրբաթօրյա իմամ Մոհամմադ Ալի Ալե Հաշեմը: Իրանի Կարմիր մահիկի ընկերության ղեկավար Փիր Հոսեյն Կոլիվանդը հայտնել է, որ վթարի հետևանքով զոհվել են ուղղաթիռի բոլոր ուղեւորներն ու անձնակազմը։ Իրանի փոխնախագահ Մոհսեն Մանսուրին հաստատել է նախագահի և նրան ուղեկցողների մահվան մասին լուրերը։