Սլովակիայի վարչապետ Ռոբերտ Ֆիցոյի դեմ մահափորձի գործով կալանավորվածը հայտարարել է, թե ցանկանում էր վիրավորել Սլովակիայի վարչապետին, քանի որ ինքը համաձայն չէ կառավարության քաղաքականության հետ և օգտագործել է ատրճանակ, որն իրեն էր պատկանում ավելի քան 30 տարի:

Ըստ Reuters-ի՝ 9 էջանոց փաստաթուղթը մանրամասնում է պատճառները, թե ինչու է դատարանը 71-ամյա կասկածյալին կալանավորելու որոշում ընդունել՝ հիմք ընդունելով հարցաքննությունը, որ  նրա հետ անցկացրել են գործը հետաքննող մարմինները։

Սրանք կասկածյալի՝ մահափորձից մեկ շաբաթ անց հրապարակված առաջին պաշտոնական մեկնաբանություններն են։

Լրատվամիջոցների տվյալներով՝ կասկածյալը՝ առեւտրի կենտրոնի անվտանգության նախկին աշխատակիցը, հայտարարել է, որ բացի իրենից ոչ ոք չգիտեր իր ծրագրերի մասին։ Նա զղջում է իր արարքի համար և պատրաստ է Ֆիցոյից ներողություն խնդրել:

Գանդլովա քաղաքում մայիսի 15-ին տեղի ունեցած մահափորձի արդյունքում Սլովակիայի վարչապետը ստացել է 4 հրազենային վիրավորում և երկու անգամ վիրահատվել։ Ռոբերտ Ֆիցոյի վիճակը կայունանում է։