Ասում են՝ եկեղեցին մտել է քաղաքական պայքարի մեջ, բայց հարցն այն է, թե քաղաքական պայքար ասելով ի՞նչ ենք հասկանում: Այս մասին NEWS.am-ի հետ զրույցում նշեց քաղաքական վերլուծաբան Ստեփան Դանիելյանը:
«Եթե քաղաքական պայքար ասելով հասկանում ենք իշխանության համար պայքար, դա մի բան է, եթե հասկանում ենք արժեքային դաշտի համար պայքար, որը նույնպես քաղաքական է, դա այլ բան է: Սա կուսակցական պայքար չէ, իշխանության համար պայքար չէ: Եկեղեցին կուսակցություն չէ, իսկ իշխանության կարող է հավակնել միայն կուսակցությունը՝ ըստ Սահմանադրության: Իսկ արժեքների համար պայքարը բնական երեւույթ է»,-ասաց նա:
Անդրադառնալով եկեղեցու նկատմամբ իշխանությունների ճնշումներին եւ հռետորաբանությանը, Ստեփան Դանիելյանն ասաց. «Հայաստանում ընդհանրապես, մշտապես իշխանությունները ընդդիմադիր հայացքներ ունեցող մարդկանց դեմ պայքարում էին տնտեսական պատժամիջոցներով, անօրինական կերպով գույք, սեփականություն բռնագրավելով, հարկային դաշտում տուգանքներով, սնանկացնելով, որ նրանք չկարողանան գոյատեւել: Դա եղել է մինչեւ 2018 թվականը, բայց 2018-ից հետո տեսնում ենք, որ դա արդեն կատռարելության է հասցվել:
Հիմա իրենց դեմ դուրս են եկել հոգեւորականներ, բնականաբար, իրենք, ըստ իրենց տրամաբանության, տնտեսապես պատժում են ամբողջ եկեղեցուն:
Մենք հիշենք, թե իշխանությունն ինչ գործիքակազմով է պայքարում. Կոմպրոմատներ, գաղտնի նկարահանումներ, գաղտնի խոսակցություններ, հետապնդել ընտանիքի անդամներին: Եվ սրանք իրենց համարում են ժողովրդավարական իշխանություն»,-ասաց նա: