նախընտրելի դարձնելՀայաստանի փոխվարչապետ, տարածքային կառավարման նախարար Արմեն Գեւորգյանն այսօր՝ հոկտեմբերի 22-ին, Գյումրիում ներկա գտնվեց «Հայփոստ» ընկերության արդիականացված եւ վերազինված փոստային բաժանմունքի բացման արարողությանը:
Բաժանմունքում մասնավորապես փոխվել եւ նորացվել են ենթակառուցվածքները, տեղադրվել են արդի ծրագրերին համապատասխանող նոր համակարգիչներ, նորացվել է մալուխային համակարգը: Նոր ենթակառուցվածքների եւ օնլայն ցանցի կիրառումը հնարավորություն կտա ավելի արագ եւ օպերատիվ փոստային, ֆինանսական եւ կոմերցիոն ծառայություններ մատուցել բնակիչներին: Գյումրիում ընկերության արդիականացված բաժանմունքի թիվն այսպիսով հասնում է վեցի, առաջիկայում նախատեսվում է նաեւ վերաբացել Մարալիկի բաժանմունքը: «Հայփոստ» ընկերությունը տարվա ընթացքում ընդհանուր առմամբ արդիականացնելու է 50 բաժանմունք, որից միայն 35-ը` մարզերում:
Փոխվարչապետը դրական համարեց ընկերության կողմից մարզերում կատարված աշխատանքները, ինչը նպաստում է, որպեսզի մարզերում եւս բնակչությունը մատուցվեն նույն ծառայությունները, ինչ մայրաքաղաքում:
Փոխվարչապետն այնուհետեւ խորհրդակցություն անցկացրեց Շիրակի մարզպետարանում, որտեղ եւս ուշադրության կենտրոնում էին սեփական եկամուտների հավաքագրման, մարզում իրականացվող ծրագրերի ընթացքը, հրատապ այլ հարցեր: Խորհրդակցությանը մասնակցում էին մարզպետ Աշոտ Գիզիրյանը, համայնքների ղեկավարներ, մարզպետարանի պատասխանատուներ:
Զեկուցվեց մարզում գյուղատնտեսական աշխատանքների, ինչպես նաեւ հողօգտագործողներին մատչելի գնով պարարտանյութ եւ դիզելային վառելանյութ տրամադրելու պետական ծրագրերի, առաջին վերարտադրության ցորենի սերմացուի հավաքագրման ընթացքի մասին:
Այնուհետեւ Գյումրիի վերաբերյալ առանձին խորհրդակցություն անցկացվեց, որի ընթացքում քաղաքապետ Սամվել Բալասանյանը տեղեկություններ ներկայացրեց սեփական եկամուտների հավաքագրման եւ քաղաքում իրականացվող ծրագրերի մասին: Քննարկումների ընթացքում պայմանավորվածություն ձեռք բերվեց լրացուցիչ ուսումնասիրություններ կատարել համայնքի կողմից այլ անձանց նկատմամբ ստանձնած պարտավորությունների մասով: Փոխվարչապետն անհրաժեշտ համարեց, որ համայնքը կատարի հաստատված պարտավորությունները`բոլոր ուղղություններով եւ ամբողջությամբ: Որոշվեց, որ հարցին լրացուցիչ անդրադարձ կլինի առաջիկա մեկ շաբաթվա ընթացքում:
