նախընտրելի դարձնելԵրեւանի քաղաքապետարանի 2013թ-ի ծրագրերով շարունակվող բարեկարգման եւ կանաչապատման աշխատանքների ընթացքին Երեւանի քաղաքապետ Տարոն Մարգարյանն այս անգամ հետեւել է Դավթաշեն վարչական շրջանում:
Քաղաքապետարանի մամուլի ծառայությունից հայտնում են, որ մինչ շինհրապարակներ այցելելը, քաղաքապետը նախ ծանոթացել է թիվ 192 հանրակրթական դպրոցին կից հիմնվող նոր շախմատի դպրոցի պայմաններին: Պատասխանատուները զեկուցել են, որ վերանորոգման աշխատանքներն արդեն մոտենում են ավարտին եւ շուտով այն ամբողջությամբ կկահավորվի համապատասխան գույքով ու պաշտոնապես կբացի իր դռները: Ի դեպ, մայրաքաղաքում այ մարզաձեւի զարգացմանն օժանդակելու նպատակով քաղաքապետարանի ծրագրերով շախմատի դպրոցներ կունենան Երեւանի բոլոր վարչական շրջանները. «Մենք Շախմատի ակադեմիայի տնօրենի հետ պայմանավորվածություն ենք ձեռք բերել, որպեսզի մայրաքաղաքի բոլոր վարչական շրջաններում ունենանք շախմատի դպրոցներ: Երեւանում այսօր ունենք 3 շախմատի դպրոց եւ պատրաստվում ենք հարմարավետ պայմաններով ապահովված եւս 10-ը հիմնել»,- նշել է քաղաքապետը:
Շրջայցի շրջանակում քաղաքապետ Տարոն Մարգարյանը հետեւել է նաեւ Դավթաշենի առաջին եւ երրորդ թաղամասերի բակային տարածքներում արդեն մեկնարկած համալիր բարեկարգման աշխատանքների ընթացքին:
Տարոն Մարգարյանը զրուցել է բնակիչների հետ, լսել առաջադրվող խնդիրներն ու տեղում պատասխանատուներին հանձնարարել հաշվի առնել բնակիչների առաջարկներն ու նրանց եւս մասնակից դարձնել վարչական շրջանում իրականացվող ծրագրերին: Բնակիչներն իրենց գոհունակությունն են հայտնել քաղաքապետին, մայրաքաղաքի բոլոր՝ հատկապես ծայրամասային վարչական շրջաններում, նկատվող բարեկարգման լայնածավալ աշխատանքների համար:
Քաղաքապետ Տարոն Մարգարյանի հանձնարարությամբ, բարեկարգվող բոլոր տարածքները պարտադիր կապահովվեն նաեւ ոռոգման նոր ցանցով՝ ստեղծվող կանաչ տարածքների խնամքը պատշաճ իրականացնելու համար::
Շրջայցի շրջանակում քաղաքապետ Տարոն Մարգարյանը հետեւել է նաեւ Դավթաշենի առաջին թաղամասի 45 շենքի բակում ընթացող ֆուտբոլի նոր փոքր խաղադաշտի կառուցման աշխատանքներին: Պատասխանատուները զեկուցել են, որ անհրաժեշտ բոլոր պայմաններով ապահովված խաղադաշտն արդեն ամռանը շահագործման կհանձնվի:
Գոհունակություն հատնելով լայն թափով մեկնարկած աշխատանքների ընթացքից, դավթաշենցիները նկատել են, որ արդեն ամռանը իրենց երեխաների հետ միասին կկարողանան լիարժեք հանգստանալ հենց իրենց իսկ բակերում:
Քաղաքապետ Տարոն Մարգարյանն էլ պատասխանատուներին հանձնարարել է մշտական հսկողության տակ պահել իրականացվող աշխատանքների ընթացքն ու դրանք ավարտել սահմանված ժամկետներում, որպեսզի նորաստեղծ հանգստի այս գոտիներն օր առաջ հանձնվեն բնակիչների տնօրինմանը:
