նախընտրելի դարձնել
Թեեւ Հայաստանում հունվար-մայիս ամիսներին ներկրման ծավալները նախորդ տարվա համեմատ կրճատվել են, սակայն «պատրաստի սննդամթերքների» ներկրումը զգալի ավելացել է:
Հունիսի սկզբին Հայաստանի Ազգային վիճակագրական ծառայությունը տեղեկություն էր հրապարակել անցյալ տարվա ընթացքում հանրապետության արտաքին առեւտրի մասին:
Նշենք, որ «պատրաստի սննդամթերքները» ապրանքային անվանացուցակի արտաքին տնտեսական գործունեության IV բաժինն են:
Անցյալ տարի այդ ապրանքների գծով արտահանման ծավալը կազմել էր 254,7 միլիոն դոլար, իսկ ներկրումը` 355,7 միլիոն դոլար:
Ներկրման եւ արտահանման միջեւ անհավասարակշռություն կա շաքարի գծով` 61,7 միլիոն դոլար, իսկ ահա վերամշակված մրգերի եւ բանջարեղենների առումով այն գրեթե հավասար էր ներկրման ծավալին` 17,2 միլիոն դոլարը 17,7 միլիոն դոլարի հարաբերակցությամբ:
Հանքային եւ գազավորված ջրերի առումով բացասական ցուցանիշն անցյալ տարի գերազանցել էր 5,3 միլիոն դոլարը: Մենք ավելի շատ խմիչքներ ենք ներկրում, քան արտահանում:
Գինիների առումով մենք դրական ցուցանիշներ ունենք, արտահանումը ներկրման ծավալը գերազանցում է գրեթե 2,5 միլիոն դոլարով:
Բացի արտադրական պատճառներից, կարեւոր գործոն է նաեւ գնայինը` զուգորդված որակի հետ: Վերջերս Ռուսաստանի կողմից վրացական ալկոհոլային խմիչքներից բեռնարգելքը վերացնելուց հետո միայն առաջին խմբաքանակով Վրաստանը կարողացավ այդ երկիր ներմուծել 240 հազար լիտր գինի եւ կոնյակ:
Մենք 2,3 միլիոն դոլարի օղի ենք արտահանել, ներկրել` 22,3 միլիոն դոլարի: Պատճառը պարզ է. ներկրվող ապրանքն ավելի որակյալ է, քան տեղականը: Իսկ ահա կոնյակի արտահանումն անցյալ տարի կազմել է 126,7 միլիոն դոլար` 113 անգամ գերազանցելով ներկրումը:
Արտահանել ենք 41,8 միլիոն դոլարի ծխախոտ, ներկրել` 53,0 միլիոն դոլարի: Տարբերությունն այնքան էլ հսկայական չէ:
Հայրենական արտադրանքը գնում են «զարգացող» երկրները, օրինակ` Իրաքը: Իսկ ներկրում ենք հայտնի ընկերությունների թանկ ծխախոտները:
Այսպիսով, մեր սպառողների համար կարեւոր նշանակություն ունի որակը, այլ ոչ թե գնվող ապրանքի էժանությունը: Այդ պատճառով էլ անհրաժեշտ է տեղական արտադրանքի որակը բարձրացնել` ներկրումը կրճատելու համար: Սակայն այս հարցը, մասնավորապես` օղու պարագայում, տարիներով լուծում չի ստանում:
