նախընտրելի դարձնել
Հայաստանի վարչապետ Նիկոլ Փաշինյանը 2026 թվականի նոյեմբերի 3-ին Բրյուսելում ԵՄ ընդլայնման հարցերով գագաթնաժողովի շրջանակում Euronews-ին տված հարցազրույցում հայտարարել է, որ Հարավային Կովկասը կարող է նոր դեր ստանձնել միջազգային առևտրում՝ Հայաստանի և Ադրբեջանի միջև խաղաղության, տարածաշրջանի երեք երկրների համագործակցության և տրանսպորտային ենթակառուցվածքների զարգացման շնորհիվ։
Նա Հարավային Կովկասն անվանել է միասնական տարածաշրջան, որտեղ, չնայած երկրների միջև տարբերություններին, կան ընդհանուր շահեր և համատեղ մոտեցումներ մշակելու հնարավորություններ։
«Ես չեմ կարող խոսել Եվրամիության անունից, բայց, իմ կարծիքով, Հարավային Կովկասը միասնական տարածաշրջան է, որտեղ, իհարկե, կան տարբերություններ, բայց կան նաև ընդհանուր շահեր։ Այստեղ կարող են լինել և՛ ընդհանուր տեսակետներ, և՛ ընդհանուր ռազմավարություններ»,- ասել է Փաշինյանը։
Նա նշել է, որ Հայաստանն ավանդաբար սերտ ու ջերմ հարաբերություններ է պահպանում Վրաստանի հետ, իսկ այժմ հարաբերություններ է կառուցում նաև Ադրբեջանի հետ։ Ըստ վարչապետի՝ Հայաստանի և Ադրբեջանի միջև արդեն երկկողմ առևտուր է իրականացվում, իսկ համագործակցության հաջորդ ուղղությունը պետք է դառնա տարածաշրջանային ենթակառուցվածքային փոխկապակցվածության զարգացումը։
Փաշինյանն անդրադարձել է TRIPP նախագծին, որը, ըստ նրա, պետք է նոր հնարավորություններ բացի տարածաշրջանում տրանսպորտային հաղորդակցության համար։
«Այժմ մենք պատրաստվում ենք իրականացնել TRIPP նախագիծը, որը հնարավորություններ կբացի տարածաշրջանային ենթակառուցվածքային փոխկապակցվածության համար։ Այս ամբողջ գործընթացը կարող է Հարավային Կովկասին բոլորովին նոր համաշխարհային դեր հաղորդել»,- հայտարարել է նա։
Վարչապետն այս հեռանկարները կապել է համաշխարհային մատակարարման շղթաների խնդիրների և Կենտրոնական Ասիայի աճող նշանակության հետ։ Նրա գնահատմամբ՝ Հարավային Կովկասով անցնող տրանսպորտային ուղիների զարգացումը կարող է օգնել հաղթահարել համաշխարհային մատակարարումների դժվարությունները և բարձրացնել տարածաշրջանի նշանակությունը միջազգային լոգիստիկայի համար։
«Աշխարհը բախվում է համաշխարհային մատակարարման շղթաների ճգնաժամի։ TRIPP նախագիծը, Հայաստանի և Ադրբեջանի միջև խաղաղությունը և Վրաստանի, Հայաստանի ու Ադրբեջանի համագործակցությունը, հատկապես լոգիստիկայի ոլորտում, նոր հնարավորություններ են բացում այս ճգնաժամը հաղթահարելու համար»,- ասել է Փաշինյանը։
Նա հավելել է, որ տարածաշրջանում ձևավորվում է նոր առևտրային ուղի, որը կարող է նշանակություն ունենալ աշխարհի տարբեր մասերի համար։
«Կարծում եմ՝ այժմ մենք բազմաթիվ երկրների, հատկապես Եվրոպական միության, Չինաստանի, Մերձավոր Արևելքի և Հյուսիսային Աֆրիկայի համար նոր համաշխարհային առևտրային ուղի ստեղծելու գործընթացում ենք»,- հայտարարել է վարչապետը։
