նախընտրելի դարձնել
Երեւանի քաղաքապետարանում ներքաղաքային ուղևորափոխադրումների վարձի ձեւավորման նպատակով ստեղծված հանձնաժողովի հերթական նիստն է կայացել։
Նիստի մասնակիցները դիտարկել են ամսվա ընթացքում մեկ միկրոավտոբուսի ծախսային մասը։ Երեւանի քաղաքապետարանի ներկայացրած հաշվարկը ընդունվել է բոլոր կետերով՝ գրեթե բոլոր մասնակիցների կողմից (ամենաակտիվ եւ պատրաստված ընդդիմադիրը «Իրազեկ եւ պաշտպանված սպառող» ՀԿ-ի նախագահ Բաբկեն Պիպոյանն է եղել)։ Իսկ հաջորդ նիստում ծախսերը կբաժանեն ուղեւորների թվի վրա։ Եվ ճշմարտությունը կարող է դառը լինել։
Երեւանի քաղաքապետարանի ներկայացրած հաշվարկներից մեկում տրանսպորտի ուղեվարձի ինքնարժեք է նշված 202 դրամը: Տեսախցիկների առաջ նման բան ամեն մեկն ասել չի ցանկանա, քաղաքացիները դա ծայրահեղ կընդունեն: Թեեւ վերջին երեք ամիսներին տրանսպորտային ընկերությունների տնօրենները էկրաններին ավելի հաճախ էին հայտնվում, նրանց փաստարկներն առայժմ հրապարակավ հայտնի չեն, թեեւ զուտ տնտեսական են եւ ոչ անհիմն: Եվ «սեւ» հաշվարկը դեռ ոչ մի տեղ հրապարակված չէ:
Դրա ծախսերը գրեթե չեն տարբերվում «սպիտակից», որը քաղաքապետարանն արդեն առաջարկել է հանձնաժողովի քննարկմանը: Նորությունն այլ է. «սեւ» հաշվարկում քաղաքապետարանը նշել է, թե միջինը որքան ուղեւոր է ամսական մեկ երթուղայինից օգտվում՝ 5915:
Երթուղայինի ամսական եկամուտը (1 միլիոն 45 հազար) բաժանելով ուղեւորների քանակի վրա (5915)՝ ստացվում է 176 դրամ ինքնարժեք: Եկամուտի ի՞նչ նորմա դրան հավելել: Եթե 10%, կստացվի 194 դրամ: Այսինքն՝ համարյա 200 դրամ: Սակայն ով եւ երբ կհամարձակվի դա ասել, դեռ հայտնի չէ:
