ՆախընտրելիՀայաստանի նախագահ Սերժ Սարգսյանը ցավակցական հեռագիր է հղել ակադեմիկոս Ալեքսեյ Սիսակյանի ընտանիքին: Հեռագրում, մասնավորապես, ասված է.
«Խոր ցավով տեղեկացա ականավոր գիտնական, Հայաստանի գիտությունների ազգային ակադեմիայի արտասահմանյան անդամ, Ռուսաստանի գիտությունների ակադեմիայի իսկական անդամ, Դուբնայի միջուկային հետազոտությունների միացյալ ինստիտուտի տնօրեն Ալեքսեյ Նորայրի Սիսակյանի մահվան մասին:
Ալեքսեյ Սիսակյանը արժանիորեն համաշխարհային համբավ վայելող գիտնական էր: Լինելով վաստակաշատ կենսաքիմիկոս, ակադեմիկոս Նորայր Սիսակյանի հիմնադրած գիտնականների տոհմի արժանի զավակը՝ Ալեքսեյ Սիսակյանն իր բեղմնավոր ու հիմնարար աշխատանքով և գիտությանն անմնացորդ նվիրումով վառ օրինակ է յուրաքանչյուր երիտասարդ գիտնականի համար:
Անուրանալի է նրա ավանդը` որպես գիտական գործունեության կազմակերպիչ: Հմուտ ղեկավարի նրա կարողությունները լավագույնս դրսևորվել են Դուբնայի աշխարհահռչակ ինստիտուտը ղեկավարելու տարիներին:
Կորստի այս ծանր պահին իմ ցավակցությունն եմ հայտնում մեծ գիտնական և հայ ժողովրդի արժանավոր զավակ Ալեքսեյ Սիսակյանի ընտանիքին, հարազատներին և գործընկերներին»:
