Չինաստանի իշխանությունները հույս են հայտնել, որ Ռուսաստանի եւ ԱՄՆ-ի միջեւ քաղաքական լարվածությունը ոչնչի չի հանգեցնի: Այս մասին հերթական ճեպազրույցի ժամանակ ասել է Չինաստանի արտաքին գործերի նախարարության պաշտոնական ներկայացուցիչ Լու Կանը, փոխանցում է «ՏԱՍՍ»-ը:

Նրա խոսքով՝ վերջին շրջանում ռուս-ամերիկյան հարաբերությունները բավականին բարդացել են: «Ռուսաստանը եւ Միացյալ Նահանգները աշխարհի խոշորագույն տերություններն ու ՄԱԿ-ի Անվտանգության խորհրդի մշտական անդամներն են. նրանք հատուկ պատասխանատվություն են կրում միջազգային կայունության պահպանման համար, - ասել է նա,- Մենք անկեղծորեն հույս ունենք, որ երկու կողմերը կկարգավորեն տարաձայնությունները երկխոսության միջոցով` փոխադարձ հարգանքի հիման վրա»:

Մարտի 26-ին ԱՄՆ-ն հայտարարել էր 60 ռուս դիվանագետի արտաքսման եւ Սիեթլում Ռուսաստանի գլխավոր հյուպատոսության փակման մասին: Եւս 24 եվրոպական երկիր, Ավստրալիան, Վրաստանը եւ Կանադան նույնպես որոշեցին արտաքսել  Ռուսաստանի Դաշնության դիվանագետներին (ընդհանուր առմամբ՝ 63 մարդ): ՆԱՏՕ-ն կրճատել է դաշինքում Ռուսաստանի առաքելության կազմը՝ 30-ից՝ մինչեւ 20 մարդ, իսկ Եվրամիությունը հետ է կանչել Մոսկվայում իր դեսպանին խորհրդակցությունների համար, ում օրինակին հետեւել են նաեւ Բուլղարիան, Լյուքսեմբուրգը, Մալթան, Պորտուգալիան եւ Սլովակիան (ավելի վաղ Լոնդոնն արտաքսել էր 23 ռուս դիվանագետի, Մոսկվան պատասխանել էր նույն քանակությամբ բրիտանացիների արտաքսմամբ):