նախընտրելի դարձնելՀայաստանի նախագահ Սերժ Սարգսյանը ցավակցական հեռագիր է հղել ժողովրդական արտիստ Վահագն Ստամբոլցյանի մահվան կապակցությամբ:
Նախագահի գրասենյակից NEWS.am-ին հայտնում են, որ Ստամբոլցյանների ընտանիքին ուղղված ցավակցական հեռագրում, մասնավորապես, ասված է.
«Խոր ցավով լսեցի Հայաստանի Հանրապետության ժողովրդական արտիստ, Երեւանի Կոմիտասի անվան պետական կոնսերվատորիայի պրոֆեսոր, երգեհոնահար Վահագն Ստամբոլցյանի մահվան բոթը:
Մենք կորցրինք տաղանդավոր երգեհոնահարի եւ հմուտ մանկավարժի, որի ավանդն անգնահատելի է հայ երգեհոնային կատարողական արվեստում: Վահագն Ստամբոլցյանի անունն ու հիշատակը միշտ վառ կմնան մեր սրտերում:
Խորապես ցավակցում եմ Ձեզ եւ կիսում Ձեր վիշտը»:
Հայաստանի ժողովրդական արտիստ, միջազգային մրցույթների դափնեկիր, երգեհոնահար Վահագն Ստամբոլցյանը մահացել էր հուլիսի 5-ի առավոտյան սրտի կաթվածից, 81 տարեկան հասակում:
Նշենք, որ Վահագն Ստամբոլցյանը իր 80-ամյա հոբելյանի առթիվ համերգային շրջագայություններով էր հանդես գալիս: Հունիսի 17-ին Կապանի արվեստի պետական քոլեջը հյուրընկալել էր սիրված երգեհոնահարին: Երգեհոնահարը նշել էր, որ ինքը չի սիրում նշել իր ծննդյան օրերը, բայց չի կարողացել մերժել մշակույթի նախարարության եւ կամերային երաժշտության ազգային կենտրոնի նախաձեռնությունը:
Ստամբոլցյանի հոբելյանին նվիրված 1-ին համերգները տեղի են ունեցել Սանկտ-Պետերբուրգում, քանի որ նա ուսումը ստացել է հենց այդ քաղաքում եւ 10 տարի էլ աշխատել այնտեղ:
Կապանում իր ելույթից հետո, Վահագն Ստամբոլցյանի առողջական վիճակը վատթարացել է եւ նրան սրտի կաթվածով տեղափոխել են Կապանի բժշկական կենտրոն, այնտեղից էլ` «Էրեբունի» բժշկական կենտրոն:
