ՆախընտրելիԹուրքիայի ընդդիմադիր Ժողովրդա-հանրապետական կուսակցության առաջնորդ Քեմալ Քըլըչդարօղլուն կառավարությանը կոչ է արել հրաժարական տալ` կապված հոկտեմբերի 19-ին, քուրդ ապստամբների հարձակման հետ, ինչի արդյունքում երկրի հարավ-արեւելքում սպանվել էին 26 թուրք զինծառայողներ եւ ոստիկաններ:
Մամլո ասուլիսի ընթացքում, կուսակցության առաջնորդը վարչապետ Ռեջեփ Թայիփ Էրդողանին եւ իշխող «Արդարություն եւ զարգացում» կուսակցությանը մեղադրել է երկրում վերջին ժամանակներս ակտիվացած ահաբեկչական գործողությունների մեջ: «Վարչապետը չպետք պատասխանատվությունը ուրիշների վրա գցի: Նա պետք է իմանա իր պարտականությունները: Նա ընդդիմադիր կուսակցության առաջնորդ չէ, նա երկիր է ղեկավարում: Ուզում եմ ընդգծել, որ մեր զոհերի միակ պատասխանատուն իշխող «Արդարություն եւ զարգացում» կուսակցությունն է եւ նրա առաջնորդ, վարչապետ Ռեջեփ Թայիփ Էրդողանը», - հայտարարել է նա:
Հիշեցնենք, որ Թուրքիայի լրատվամիջոցների տվյալներով` Հաքքարիում, հոկտեմբերի 19-ին, տեղի ունեցած թուրք ոստիկանների վրա քուրդ ապստամբների գրոհի հետեւանքով զոհվել են անվտանգության ուժերի 26 աշխատակիցներ, եւս 22 մարդ ստացել են մարմնական վնասվածքներ:
Քրդական բանվորական կուսակցության անդամները կրակել են գավառի Իրաքի հետ սահմանի անցակետերի վրա, հարձակումները կատարվել են միաժամանակ:
Թուրքիայի զինված ուժերը Իրաքի հյուսիսում ցամաքային եւ օդային գործողություններ են սկսել: Haber7 հեռուստաալիքի տվյալներով` հարձակումից հետո ապստամբները թաքնվել էին Իրաքի տարածքում: Թուրքիայի ռազմաօդային ուժերը օդային հարվածներ են հասցրել Քրդստանի բանվորական կուսակցության (ՔԲԿ) դիրքերին հյուսիսային Իրաքում:
ԱՄՆ նախագահ Բարաք Օբաման քննադատել է հարձակումները՝ որակելով դրանք իբրեւ «ակնհայտ ահաբեկչական գործողություն»:
