Ադրբեջանի նախագահ Իլհամ Ալիևը շնորհավորական նամակ է հղել Ուկրաինայի նախագահ Վլադիմիր Զելենսկիին՝ Անկախության օրվա կապակցությամբ, հայտնում են ադրբեջանական լրատվամիջոցները։

Իր ուղերձում Ալիևը «իր և ադրբեջանցի ժողովրդի անունից ամենաանկեղծ շնորհավորանքներն ու բարեմաղթանքներն է հղել իր ուկրաինացի գործընկերոջը և Ուկրաինայի ողջ ժողովրդին»։

Նա ընդգծել է, որ Ադրբեջանի և Ուկրաինայի հարաբերությունները հիմնված են «փոխադարձ հարգանքի, բարեկամության և համակրանքի վրա, որոնք ունեն խորը պատմական արմատներ»։

Ըստ նրա, այդ կապերը շարունակում են ամրապնդվել և զարգանալ՝ համալրվելով նոր բովանդակությամբ։

Քաղաքական երկխոսությունը, համագործակցությունը տնտեսության, տրանսպորտի, էներգետիկայի և հումանիտար ոլորտներում երկկողմ հարաբերությունների հիմնական ուղղություններն են։

Ինչպես նշել է Ալիևը, «ինքնիշխանության և տարածքային ամբողջականության հարցերում փոխադարձ աջակցությունը, որը հիմնված է միջազգային իրավունքի նորմերի և սկզբունքների վրա, արժանի է բարձր գնահատականի»։

Նա հավաստիացրել է, որ Ադրբեջանն այսուհետ ևս Ուկրաինային անհրաժեշտ մարդասիրական օգնություն կցուցաբերի։

Ալիևը վստահություն է հայտնել, որ «բարեկամության և համագործակցության հետագա ամրապնդմանն ուղղված համատեղ ջանքերը հետևողականորեն կշարունակվեն»։