«Սուտ խոսելը լավ բան չէ». Գևորգ Պապոյանն արձագանքել է Գառնիկ Դանիելյանի ահազանգին և թվեր ներկայացրել

ՀՀ էկոնոմիկայի նախարար Գևորգ Պապոյանը հերքել է ԱԺ «Հայաստան» խմբակցության պատգամավոր Գառնիկ Դանիելյանի այն ահազանգը, թե Վերին Լարսի անցակետից հարյուրավոր բեռնատարներ վերադառնում են Հայաստան։

Օգոստոսի 23–ին Գառնիկ Դանիելյանը տեսանյութ էրհրապարակել սոցցանցում և նշել, որ Վերին Լարսի անցակետից Հայաստան վերադարձող մեքենաները բեռնված են գյուղմթերքով` սալորով, դեղձով, խաղողով։ Նա նշել էր, որ բեռնափոխադրողներին չի տրվում հստակ պատճառաբանություն, խոսվում է բուսասանիտարիայի հետ կապված ինչ-որ խնդիրների մասին: Նա նաև նշել էր, որ բազմաթիվ բեռնատարներ անորոշության մեջ դեռ սպասում են անցակետում։

«Օգոստոս ամսվա ընթացքում ՌԴ է մտել Հայաստանի մրգերով և բանջարեղենով բարձված 762 բեռնատար մեքենա և Վրաստանից հետ է վերադարձվել ընդամենը 4-ը։

Գառնիկ ջան, սուտ խոսելը լավ բան չէ»,–գրել է Պապոյանը։

Մեկ այլ գրառման մեջ նախարարը նշել է. «Օգոստոս ամսվա ընթացքում ՌԴ է մտել Հայաստանից արտահանվող ապրանքներով բեռնված 2427 բեռնատար կամ օրական միջինը 101 մեքենայից ավել, որից.

խմիչքներ՝ 610,

մրգեր՝ 447,

պերլիտային ավազ՝ 234,

բանջարեղեն՝ 315,

ծառեր, բույսեր՝ 141,

վերամշակված միրգ-բանջարեղեն՝ 84,

քարից, գիպսից և նման ապրանքներ՝ 75,

ձուկ՝ 68,

էլ. և մեխանիկ. սարքավորումներ՝ 79,

ծխախոտ՝ 21,

կաթնամթերք՝ 19,

տրիկոտաժ՝ 16,

և այլն»։

Հիշեցնենք` այս տարվա մայիսին Վրաստանի մաքսային ծառայություններն ավելի քան մեկ ամիս կանգնեցրել էին հայկական կոնյակով բեռնված մեքենաները և խմիչքի նմուշներն ուղարկել լաբորատոր անալիզի (թեև ապրանքը չի վաճառվում Վրաստանում, այլ տարանցիկ ճանապարհով տեղափոխվում է Ռուսաստան և այլ երկրներ): Հունիսի 23-ին ՀՀ էկոնոմիկայի նախարար Գևորգ Պապոյանը վրացի գործընկերների հետ բանակցություններից հետո հայտարարեց` ձեռք է բերվել պայմանավորվածություն, որ հայկական շշալցված կոնյակը (հայկական բրենդիի) այսուհետ կարտահանվի փոխադարձ ընդունելի և կանխատեսելի պայմաններով։

Հունիսին նաև ծաղիկների արտահանման խնդիր առաջացավ։ Ռոսսելխոզնադզորը հայտնեց, որ Հայաստանից Ռուսաստան մատակարարված ծաղիկների 80 խմբաքանակներից 78-ում խախտումներ են եղել։ Նույն ամսին խնդիրներ առաջացան նաև ծիրանի արտահանման հարցում։ Ծիրան տեղափոխողները դժվարությունների էին բախվել Լարսի անցակետում։