Վերջին տասնամյակի մեծ մասի ընթացքում Հունգարիայի վարչապետ Վիկտոր Օրբանին հաջողվել է ԵՄ օրակարգը հարմարեցնել սեփական կամքին՝ ստիպելով եվրոպական առաջնորդներին բարձր մակարդակի հանդիպումների ժամանակ հերթականությամբ հաղթահարել իր կիրառած վետոները։

Հինգշաբթի օրը նա պատրաստ է կրկին անել նույնը, և հնարավոր է՝ վերջին անգամ, քանի որ հաջորդ ամիս նրան վերընտրվելու համար մղվող բարդ պայքար է սպասվում։

Բրյուսելում ԵՄ առաջնորդների գագաթնաժողովի ժամանակ սպառնալով արգելափակել Ուկրաինային տրամադրվող 90 միլիարդ եվրոյի վարկը, որին ինքը հավանություն էր տվել դեռ դեկտեմբերին, Օրբանը հատել է Բրյուսելի հետ դիմակայության «կարմիր գիծը»։ Politico-ի հետ զրույցում ԵՄ հինգ դիվանագետ և եվրոպական կառավարության մի նախարար նշել են, որ սա կարող է լուրջ տարաձայնությունների հանգեցնել եվրոպական ընտանիքի հետ՝ Հունգարիայի ընտրություններից անմիջապես հետո։

«Հունգարիայի պահվածքը նոր «մինիմումն» է»,— հայտարարել է Շվեդիայի Եվրոպական հարցերով նախարար Ջեսիկա Ռոզենկրանցը։

Այն հարցին, թե արդյոք Ստոկհոլմը կդիտարկի Հունգարիայի դեմ իրավական գործիքակազմի կիրառումը (ներառյալ ԵՄ պայմանագրի 7-րդ հոդվածի գործարկումը՝ Բուդապեշտին ձայնի իրավունքից զրկելու համար), նա պատասխանել է. «Անշուշտ, մենք պատրաստ ենք դրան»։

Դեռևս հարցականի տակ է, թե կոնկրետ ինչ քայլեր կձեռնարկի ԵՄ-ն վերընտրված Օրբանին «սանձելու» համար։ Ընդ որում, դիտարկվում է նաև Օրբանին դատարանի առջև կանգնեցնելու տարբերակը՝ վարկի տրամադրմանը խոչընդոտելու պատճառով։