«Բլից հարցազրույցներ ԱԺ պատգամավորների հետ» շարքի շրջանակներում NEWS.am-ը ներկայացնում է իր հերթական հարցազրույցը: Այս անգամ զրուցել ենք ՀՀԿ խմբակցության անդամ, ԱԺ արտաքին հարաբերությունների մշտական հանձնաժողովի նախագահ Արտակ Զաքարյանի հետ:

Ե՞րբ եք սկսել հետաքրքրվել քաղաքականությամբ:

Վաղ երիտասարդության տարիքից եւ պատճառն Արցախյան շարժումն էր.

Հաջողության հասնելու Ձեր բանաձե՞ւը:

Հնարավորինս անկեղծություն ու արդարություն քո եւ շրջապատիդ հանդեպ: Եվ իհարկե հանդուրժողավանություն ու հավատ:

Ի՞նչ է Ձեզ համար քաղաքականությունը:

Քաղաքականությունն արվեստ է, որի հիմքը նպատակն է:

Ձեր կարծիքով, ովքե՞ր են ՙբոլոր ժամանակների և ժողովուրդների՚ քաղաքական գործիչները:

Արման Ժան դյու Պլեսսի դե Ռիշելյե, Պետրոս Մեծ, Եկատերինա Երկրորդ (Եկատերինա Ալեքսեեւվնա), Բենջամին Ֆրանկլին, Թեոդոր Գերցլ (Բենիամին Զեեւ), Օտտո ֆոն Բիսմարկ-Շյոնհաուզեն, Գարեգին Տեր-Հարությունյան (Նժդեհ), Թոմաս Վուդրո Վիլսոն, Ուինսթոն Լեոնարդ Սպենսեր Չերչիլ, Շառլ Անդրե Ժոզեֆ Մարի դե Գոլ , Մաո Ցզե-Դուն:

20-21-րդ դարերի հայտնի մարդկանցից ո՞ւմ հետ կցանկանայիք զրուցել:

Ադոլֆ Հիտլերի եւ Իոսիֆ Ստալինի:

Ի՞նչն է երիտասարդներին բերում քաղաքականություն:

Ի դեպ քաղաքական գործիչների մեծամասնությունը երիտասարդ տարիքից են հրապուրվում քաղաքականությամբ, սակայն  հետագայում նրանցից քչերն են ավելի հասուն տարիքում հիմնավորապես որոշում զբաղվել քաղաքականությամբ: Իսկ մեծ հաշվով առաջին փուլում երիտասարդներին քաղաքականություն է բերում հանրային կյանքին ակտիվ մասնակցելու եւ ինքնահաստատվելու մղումը, որը հետագայում կրում է տարբեր փոխակերպումներ: Ոմանք դառնում են գիտնական-տեսաբաններ, ոմանք կուսակցական ֆունկցիոներներ, ոմանք քաղաքական կամ պետական չինովնիկներ, ոմանք տեղական կամ ոլորտային կառավարիչներ: Եվ միայն քչերին է հաջողվում հաղթահարել ու հասնել պետական-քաղաքական գործչի բարձր պատասխանատվությանն ու համբավին: Դա կախված է գաղափարական պատրաստվածության եւ նվիրվածության աստիճանից:

Ձեր կարծիքով կուսակցական երիտասարդներն ինչո՞վ են տարբերվում անկուսակցականներից:

Ձեր հարցն իր մեջ պարունակում է ինտրիգ, բայց լավ հարց է: Որպես երիտասարդներ, երկու կարգավիճակում գտնվողներն էլ ոչնչով միմյանցից չեն տարբերվում: Ես ճանաչում եմ շատ պարկեշտ, բանիմաց, խելացի, նվիրյալ հայրենասեր անկուսակցականների եւ կուսակցականների, ինչպես նաեւ  հակառակ որակներով կուսակցական ու անկուսակցական երիտասարդների: Իսկ եթե նրանց դիտարկենք որպես քաղաքականությամբ զբաղվելու համար հայտ ներկայացնող մարդկանց, ապա կուսակցական երիտասարդներն արդեն արել են իրենց առաջին քայլը՝ քաղաքական կողմնորոշում ցուցաբերելով ու կուսակցական պատասխանատվություն ստանձնելով:

Քաղաքականության մեջ  լինելու պատճառով` ո՞ր նախասիրություններից եք ստիպված եղել հրաժարվել:

Շատ քիչ նախասիրություններից: Ես ձգտում եմ ապրել ազատ ու անկաշկանդ, բոլորի պես:

Ի՞նչն  է առավել շատ բավականություն պատճառում Ձեզ կյանքում եւ աշխատանքում:

Կյանքում միշտ օգտակար լինելը, թեկուզ փոքրիկ հարցում դրական դերակատարություն ունենալը: Աշխատանքում՝ իմ քաղաքական առաջնորդի ու թիմի հետ միասին շոշափելի արդյունքների ու ձեռքբերումների հասնելը: 

Ձեր գնահատմամբ` ինչպի՞սի մարդ եք:

Թերություններով:

Ձեր կարծիքով` ինչպես Ձեզ կբնութագրեն շրջապատի մարդիկ:

Աստված գիտի:

Շփվո՞ղ մարդ եք. շա՞տ ընկերներ ունեք:

Սիրում եմ շփումներ ամենատարբեր հայացքների ու զբաղմունքի տեր մարդկանց հետ: Որոշ դեպքերում դա նաեւ իմ աշխատանքի մի մասն է, որը հաճույքով եմ կատարում: Իսկ իրականում ես ունեմ ժամանակի  փորձություններով անցած ու կարծրացած փայլուն ընկերներ: Նրանցից յուրաքանչյուրն իմ կենսագրության անբաժանելի մասն են ու ես պատասխանատվություն եմ կրում նաեւ նրանց առջեւ:

Ո՞րն է Ձեր սիրելի, նախընտրելի զբաղմունքը:

Զբոսանք երեխաներիս հետ, ընթերցանություն, երաժշտություն, ժամանց ընտանեկան եւ ընկերական միջավայրում:

Հավատո՞ւմ եք աստղագուշակին, եւ գուշակություններին:

Ոչ:

Ո՞ր ժանրի գրքերին եք տալիս նախապատվություն, եւ ո՞ր հեղինակներին:

Կարդում եմ գրեթե առանց խտրականության բոլոր ժանրերի ստեղծագործությունները՝ վեպ, վիպակ, պատմվածք, նովել, բանաստեղծություն, կատակերգություն, ոդեւիլ, դրամա, բալլադ, պոեմ, առակ եւ այլն: Հեղինակներից հատուկ նախընտրություն չունեմ:

Վերջին անգամ ե՞րբ եք գիրք կարդացել:

Ընթացիկ արձակուրդներին, կարդացել եմ Ալեքսանդր Խինշտեյնի «Լուբյանկայի գաղտնիքները» եւ վերընթերցել եմ Գարեգին Նժդեհի «Հատընտիր»-ը:

Ո՞րն է ձեր կարգախոսը:

Աստծո օգնությամբ ամեն բան հնարավոր է, եթե լինես իմաստուն, արդարամիտ եւ զուսպ:

Ամենաշատն ինչի՞ց եք վախենում:

Ժամանակակից աշխարհում վախենալու պատճառներ շատ կան, բայց սարսափելու աստիճան վախենում եմ այն դիլետանտներից, ովքեր զբաղվում են հայրենանվեր աշխատանքով եւ այն պրեֆեսիոնալներից, ովքեր գործում են ի վնաս մեր երկրի:

Ո՞րն է Ձեր վատագույն սովորությունը:

Իսկ դուք ո՞ր մեկն ի նկատի ունեք:

Ինչի մասին եք ամենաշատը ափսոսում:

Ափսոսում եմ ժամանակի կորստի համար, ափսոսում եմ, որ այն հնարավոր չէ կանգնեցնել կամ ետ պտտել: Դա միակ բանն է, որ մենք կորցնում ենք ամեն օր, ամեն պահ:

Ո՞րն է Ձեր կյանքի լավագույն օրը:

Սեպտեմբերի 24-ը եւ մայիսի 5-ը: Այդ օրերին ծնվել են իմ երեխաները:

Ո ՞րն է Ձեր ամենառոմանտիկ հիշողությունը:

Դա իմ անձնական արխիվի խիստ կոնֆիդենցիալ հիշողություններից է:

Ի՞նչ եք երազում նվեր ստանալ ծննդյան օրվա առիթով:

Երբեք մտքովս չի անցել մտածել այդ մասին:

Սիրու՞մ եք նվերներ անել, հատկապես անակնկալ նվերներ:

Նվերները ցանկալի է, որ լինեն անակնկալ, այլապես դառնում են մեր կյանքի բազմաթիվ արարողակարգերից մեկը, որը մենք այսպես թե այնպես պետք է իրականացնենք:

Ո՞րն է Ձեր մասին տարածված ամենաանհեթեթ բամբասանքը:

Տարօրինակ է, բայց իմ մասին բամբասանքներ դեռ չեմ լսել: Դա երեւի լավ նշան չէ: Իսկ ընդհանրապես բամբասանքներն ահազանգ են, որ ինքդ քեզ համար պարզես` ճի՞շտ ես արդյոք ապրում: Եթե համոզվում ես, որ «այո՛», ու հարազատ մարդիկ էլ են այդպես կարծում, ապա կարիք չի լինի ուշադրություն դարձնել բոլոր այն անհեթեթ խոսակցություններին, որոնց մասին վաղ թե ուշ մոռանալու են բոլորը:

Ձեզ դու՞ր է գալիս հարցազրույց տալը:

Երբեմն` ոչ:

Հարցազրույցների ընթացքում ո՞ր հարցն է նյարդայնացնում Ձեզ:

Բոլոր այն հարցերը, որոնց ստիպված եմ տալ ոչինչ չասող պատասխաններ: Չնայած դրանք հազվադեպ են լինում:

Ինչպիսի՞ ապագա եք կանխատեսում Ձեզ համար:

Հայաստանի Հանրապետության եւ Լեռնային Ղարաբաղի ճանաչված Հանրապետության երկքաղաքացիություն ունեցող անձ:

Ի՞նչ կենդանի եք սիրում, եւ ո՞ր հատկանիշի համար:

Վագր, որին կարելի է բնութագրել որպես ուժի խորհրդանիշ՝ մեծահոգի, վիրավորանքների հանդեպ հանդուրժող, կրքոտ, արդար եւ համեստ:

Ի՞նչ կցանկանայիք  ավելացնել Ձեր մասին

Ամբողջովին Ձեր Արտակ Զաքարյան:

Ավելի վաղ NEWS.am-ը ներկայացրել էր հարցազրույց ԱԺ ՀՀԿ խմբակցության պատգամավոր Արփինե Հովհաննիսյանի, Լեւոն Մարտիրոսյանի, Նաիրա Կարապետյանի, Հայկ Գրիգորյանի, Մարգարիտ Եսայանի, Գարեգին Նուշիկյանի,  ԲՀԿ խմբակցության պատգամավոր Տիգրան Ուրիխանյանի, Էլինար Վարդանյանի, Վահե Էնֆիաջյանի, Նաիրա Զոհրաբյանի,  ՀԱԿ-ից Լյուդմիլա Սարգսյանի, Հրանտ Բագրատյանի, Գագիկ Ջհանգիրյանի, «Ժառանգությունից»` Ռուբեն Հակոբյանի, Խաչատուր Քոքոբելյանի, ՀՅԴ-ից` Արծվիկ Մինասյանի հետ, անկախ պատգամավոր Էդմոն Մարուքյանի հետ: