«Բլից հարցազրույցներ ԱԺ պատգամավորների հետ» շարքի շրջանակներում NEWS.am-ը ներկայացնում է իր հերթական հարցազրույցը: Այս անգամ զրուցել ենք ԱԺ ՀՀԿ խմբակցության պատգամավոր Արտակ Դավթյանի հետ:
Ո՞վ եք դուք եւ ինչպիսի՞ն եք:
Հայ մարդ, ՀՀ քաղաքացի, իսկ թե ինչպիսին եմ, ճիշտ կլինի` ինձ ճանաչողները ասեն:
Ի՞նչ սկզբունքներով եք առաջնորդվում:
Այդ սկզբունքները բավականին շատ են:
Լավագույն աֆորիզմը:
Յուրաքանչյուր դեպքի համար կան տարբեր աֆորիզմներ: Ինձ շատ է դուր գալիս Սենեկայի այն միտքը, որ հաճախ, երբ ես հիշում եմ` ինչ եմ ասել, նախանձում եմ խուլ ու համրերին:
Այսինքն, երբեւէ ձեր ասածի համար «ընկե՞լ եք կրակը»:
Արդեն կարծես պատասխանեցի այդ հարցին, եղել են դեպքեր, երբ ասվել է խոսք, որը հետագայում ուրիշ կերպ է հասկացվել:
Ո՞րն է ամենախոցելի կողմը:
Ցանկացած մարդ ունի խոցելի կողմեր, երբեք չեմ մտածել` իմ խոցելի կողմերից որն է ամենախոցելին:
Ձեր առավելությունների եւ թերությունների մասին կբարձրաձայնե՞ք:
Ավելի լավ կլինի ոչ առավելության, ոչ էլ թերության մասին չխոսեմ:
Ամենահամարձակ քայլը, որ արել եք:
Կարծում եմ, որ յուրաքանչյուր օր առիթ լինում է ինչ-ինչ քայլեր ձեռնարկելու, եւ յուրաքանչյուր քայլ, որ արվում է, իր մեջ որոշակի համարաձակության պաշար պարունակում է: Ձեր հարցերին պատասխանելը եւս որոշակի համարձակություն է պահանջում: Կդժվարանամ ասել, թե որն է ամենահամարձակը:
Ամենախենթ երազանքը:
Խենթ չէ եւ դժվար է ասել, որ երազանք է, բայց իմ ամենակարեւոր ցանկությունն է, որ իմ ապրած կյանքի ընթացքում տեսնեմ իմ երկիրը այնպիսին, ինչպիսին մեր Սահմանադրության մեջ է գրված:
Քանի՞ անգամ եք դավաճանել եւ դավաճանվել:
Ուղղակի զերծ կմնամ դավաճանել եւ դավաճանվել եզրույթից, որովհետեւ դա ամենասոսկալի զգացումներից է: Կյանքում, իհարկե, պատահել են պահեր, երբ դավաճանված լինելու զգացում ունեցել եմ, կարծում եմ` բոլորի հետ էլ պատահել է: Միակ բանը, որ ընդհանրապես չեմ ների, դավաճանելն է: Ես կյանքում չեմ դավաճանել:
Ի՞նչն է ձեզ ուրախացնում կյանքում:
Ցանկացած պահի, երբ զգում եմ, որ որեւէ մեկին օգտակար եմ լինում, ինձ անկեղծ ուրախություն է պատճառում դա: Կյանքի կարեւորագույն իմաստը մարդկանց օգնելն է:
Տխրությունն ի՞նչ գույն ունի:
Գորշ գույներից ինչ-որ մեկը:
Ի՞նչ հոգսեր ունեք:
Չէ, հոգս երեւի թե չունեմ:
Երբեւէ արտասվե՞լ եք:
Իհարկե, արտասվել ոչ միայն բացասական զգացումներից, այլեւ ուրախությունից: Ամենավերջին պահը սեպտեմբերի 21-ն էր, այնպիսի ուրախություն էր տեսնել, թե ինչպես են ուրախանում մեր անկախության 20-ամյակի կապակցությամբ, անկեղծ ասած` դժվար էր զսպել արցունքները:
Հաջողության հասնելիս ո՞վ է ձեզ օգնել:
Հաջողության հասնելիս ինձ շատ մարդիկ են օգնել, բայց ամենակարեւոր մարդը, ում անունը կցանկանայի նշել, իմ կինն է:
Ովքե՞ր են ձեզ հիասթափեցրել:
Շատ մարդիկ, այդ թվում` վերջին օլիմպիադայի հետ կապված:
Ի՞նչն է ձեզ հուսահատեցնում:
Այն, երբ զգում եմ, որ ինչ-որ բան անելու համար իմ ուժերը չեն բավականացնում:
Շա՞տ են նման իրավիճակներ լինում:
Կարծում եմ` ոչ:
Երջանկությունը ո՞ւմ կերպարով է ձեզ ներկայանում:
Փոքրիկ դստրիկի:
Հենց հիմա` այս հարցազրույցի շրջանակներում, կխնդրեի մեկ բացահայտում անեիք ձեր մասին, որ հենց հիմա հանրությունը չի լսել, չգիտի:
Կարող եք ինքներդ անել այդ բացահայոտւմը: Իմ մասին գիտեն այն, ինչ պետք է իմանալ, իսկ այն, ինչը պետք չէ իմանալ, իմ անձնական տիրույթն է:
Ի՞նչ բամբասանքներ եք լսել ձեր մասին:
Ամենատարբեր տիպի բամբասանքներ լսել եմ եւ կլսեմ, անկեղծ ասած` դրանք ինձ քիչ են հետարքրքում, դրանք այնքան շատ են:
Կռիվների, ծեծկռտուքների որքանո՞վ եք մասնակցել եւ կապտուկներով տուն եկե՞լ եք:
Չեմ ասի` շատ հաճախ, բայց մասնակցել եմ, կապտուկներով անպայման տուն եկել եմ:
Խաղատներ այցելելիս ամենամեծ գումարը, որ հաղթել եւ պարտվել եք:
Կարծում եմ` խաղատները եւս մարդկանց համար են, այո, այցելել եմ, ես խաղամոլ չեմ, այցելել եմ ոչ միայն հետաքրրքությունից, այլեւ ժամանց անցկացնելու նպատակով: Երկու տարի առաջ ԱՄՆ-ում այցելել եմ, իսկ գումարը շատ սիմվոլիկ էր` 10-15 դոլար:
Նյութական ամենամեծ հարստությունը, որ ունեք:
Միգուցե ոչ թե նյութական հարտությունից խոսենք, որովհետեւ այն, ինչ ես ունեմ, գույքագրվում է հայտարարագրի մեջ: Ես մի նկարիչ ընկեր ունեի, ով մահացավ երկու ամիս առաջ, ինձ համար նյութական ամենամեծ հարստությունը ընկերոջս նկարներն են:
Հայտնի կանանցից ո՞ւմ եք հավանում` գեղեցկության առումով:
Ինձ համար գեղեցկության չափանիշ է Էլիզաբեթ Թեյլորը:
Քանի՞ անցած սեր եք ունեցել:
Հիմա չթվարկենք եւ չհաշվենք, մարդ բնականաբար անցած սերեր ունենում է:
Ընտանիքում ձեզնից ի՞նչ դժգոհելու առիթներ են լինում, օրինակ` աղբը չեք թափում, շուկա չեք գնում, երեխաների հետ քիչ եք ժամանակ անցկացնում եւ այլն:
Երեւի թե դժգոհությունները կապված են ժամանակ սղության հետ:
Ձեր կինը, ինչո՞ւ եք հենց նրան ընտրել:
Դա իմ ընտրությունն է:
Ամենառոմանտիկ քայլը, որ երբեւէ արել եք:
Երեւի թե կնոջս գրած նամակներն էին:
Խմիչք եւ ծխախոտ:
Ընդհանրապես չեմ ծխել, շատ քիչ քանակությամբ նախընտրում եմ վիսկի Red Lebel:
Վերջին անգամ ե՞րբ եք խոհանոցում ինչ-որ բան պատրաստել:
Մի քանի օր առաջ` պոմիդոր, վարունգով սալաթ:
Ձեր սիրելի կերակուրները եւ որքանո՞վ եք տեղ տալիս ուտեստներին:
Ոտեստներին մեծ տեղ չեմ տալիս, նախընտրում եմ բանջարեղեն:
Եթե ոսկե ձկնիկ բռնեիք...
Բաց կթողնեի` առանց որեւէ բան խնդրելու, հեքիաթներ սիրում եմ, բայց ոսկե ձկնիկներին չեմ հավատացել եւ չեմ էլ հավատալու:
Լինում է, չի լինում...
Մի լրատվամիջոց:
Եւ
Եւ բազմակետեր…
Մեր շարքին մասնակցող նախորդ պատգամավոր` ՀՀԿ-ից Կարինե Աճեմյանը հարց է ուղղել շարքին մասնակցող հաջորդ պատգամավորին, որը դուք եք: Նա ձեզ հարցնում է` ինչպես անցկացրեցիք ձեր ամառային հանգիստը եւ արդյոք այժմ ձեզ չեն անհանգստացնում ավելացած կիլոգրամները:
Շատ լավ հանգստացա, իսկ լավ հանգիստը դա նշանակում է, որ ոչ միայն կգ-ներ չեմ ավելացրել, այլեւ նվազեցրել եմ:
Այժմ ձեր հարցը շարքին մասնակցող մյուս պատգամավորին:
Որն է ձեր կյանքի ամենաերջանիկ օրը:
Նշենք, որ 46-ամյա Արտակ Դավթյանը ԱԺ-ում հնաբնակներից է, պատգամավոր է դեռեւս 2007թ: Մասնագիտությամբ տնտեսագետ է, աշխատել է որպես մարզիչ, տնտեսագետից մինչեւ կառավարիչ, էներգետիկայի փոխնախարար եւ այլն: Ամուսնացած է, ունի երեք երեխա:
Ավելի վաղ NEWS.am-ը ներկայացրել էր հարցազրույց ԱԺ ՀՀԿ խմբակցության պատգամավոր Արփինե Հովհաննիսյանի, Լեւոն Մարտիրոսյանի, Նաիրա Կարապետյանի , Հայկ Գրիգորյանի , Մարգարիտ Եսայանի, Գարեգին Նուշիկյանի , Հովհաննես Սահակյանի, Արտակ Զաքարյանի , Կարինե Աճեմյանի , ԲՀԿ խմբակցության պատգամավոր Տիգրան Ուրիխանյանի , Էլինար Վարդանյանի , Վահե Էնֆիաջյանի , Նաիրա Զոհրաբյանի , ՀԱԿ-ից Լյուդմիլա Սարգսյանի , Հրանտ Բագրատյանի , Գագիկ Ջհանգիրյանի «Ժառանգությունից»` Ռուբեն Հակոբյանի , Խաչատուր Քոքոբելյանի , Ալեքսանդր Արզումանյանի , ՀՅԴ-ից` Արծվիկ Մինասյանի հետ, Աղվան Վարդանյանի , անկախ պատգամավոր Էդմոն Մարուքյանի հետ:
Շարքը` Ինգա Մարտինյանի