«Բլից հարցազրույցներ ԱԺ պատգամավորների հետ» շարքի շրջանակներում NEWS.am-ը ներկայացնում է իր հերթական հարցազրույցը: Այս անգամ զրուցել ենք ՀՀԿ խմբակցության պատգամավոր Շիրակ Թորոսյանի հետ:
Ձեր գնահատմամբ` ինչպիսի՞ մարդ եք:
Սովորական մարդ եմ` մարդկային բոլոր առավելություններով ու թերություններով հանդերձ:
Իսկ ինչպե՞ս Ձեզ կբնութագրեն շրջապատի մարդիկ:
Սովորաբար ինձ շրջապատում գնահատում են որպես ընկերասեր, աշխատասեր եւ նպատակասլաց մարդու:
Ձեր առավելությունները եւ թերությունները:
Թերությունս այն է, որ շուտ եմ բռնկվում, իսկ առավելությունը այն է, որ չեմ սիրում, երբ ստիպում են ինձ լավ բաներ ասել ինքս իմ մասին:
Շփվո՞ղ եք. շա՞տ ընկերներ ունեք:
Շփվող եմ, ունեմ բավականաչափ ընկերներ:
Ո՞րն է ձեր կարգախոսը:
Լինել անդավաճան եւ սկզբունքային:
Ամենամեծ սուտը, որ ասել եք:
Երբեմն լինում են դեպքեր, երբ մի անմեղ սուտը կարող է շատ բաներ տակնուվրա անել:
Կարող եք ձեր մասին այնպիսի մի սուտ ասել, որ թագավորության կեսը տանք ձեզ:
Ես աչք չունեմ NEWS.am-ի թագավորության վրա, հետեւաբար թող ձեր թագավորությունը ձեզ մնա, ինչպես ասում են` Աստծունը` Աստծուն, թագավորինը` թագավորին:
Իսկ ո՞րն է Ձեր մասին տարածված ամենաանհեթեթ բամբասանքը:
Հիշողությանս մեջ նման բան չի տպավորվել:
Ձեր ամենամեծ մեղքը ո՞րն է:
Տա Աստված, որ ամենամեծ մեղքս չգործեմ:
Ո՞րն է Ձեր վատագույն սովորությունը:
Գիշերը ուշ քնելը:
Ինչի՞ համար եք ամենաշատը ափսոսում:
Ափսոսում եմ չարածներիս համար:
Ամենահամարձակ քայլը:
Ապրել եմ սովորականի նման, իմ կյանքը այսպիսին է, համարձակ դրվագներ եղել են, բայց չեմ կարողանում մատնանշել,թե որն է ամենահամարձակը:
Ի՞նչն է առավել շատ բավականություն պատճառում Ձեզ կյանքում եւ աշխատանքում:
Մարդկանց օգնելը: Գործի բերումով շատ եմ առնչվում Ջավախքի եւ ջավախքցիների հիմնախնդիրների հետ եւ աշխատում եմ առավելագույնս նպաստ բերել այդ խնդիրների լուծմանը:
Ո՞րն է Ձեր սիրելի, նախընտրելի զբաղմունքը:
Ընթերցանությունը, ձկնորսությունը, լողը:
Ո՞ր ժանրի գրքերին եք նախապատվություն տալիս, եւ ո՞ր հեղինակներին:
Ընթերցում եմ` ըստ տրամադրության եւ անհրաժեշտության:
Վերջին անգամ ե՞րբ եք գիրք կարդացել:
Կարդում եմ գրեթե ամեն օր:
Հավատո՞ւմ եք աստղագուշակին, եւ գուշակություններին:
Չեմ կարեւորում:
Ամենաշատն ինչի՞ց եք վախենում:
Ինքնաթիռով թռչելուց:
Ի՞նչ կենդանի եք սիրում, եւ ո՞ր հատկանիշի համար:
Սիրում եմ շուն` հավատարմության համար:
Հաջողության հասնելու Ձեր բանաձե՞ւը:
Հետեւողականություն, ազնվություն, տքնաջան աշխատանք:
Ո՞րն է Ձեր կյանքի լավագույն օրը:
Որդուս ծննդյան օրը:
Երջանկությունն ի՞նչ գույն ունի:
Վառ նարնջագույն:
Ե՞րբ եք սկսել հետաքրքրվել քաղաքականությամբ:
Ուսանողական տարիներից:
Ի՞նչ է Ձեզ համար քաղաքականությունը:
Քաղաքական ոլորտում առաջ քաշված նպատակների իրականացման միջոց:
Ձեր կարծիքով, ո՞վ է ՙբոլոր ժամանակների եւ ժողոովուրդների՚ քաղաքական գործիչը/ կամ գործիչները:
Ջուզեպպե Գարիբալդի, Մահաթմա Գանդի, Ջորջ Վաշինգտոն, Օլիվեր Կրոմվել, Օտտո Ֆոն Բիսմարկ:
20-21-րդ դարերի հայտնի մարդկանցից ո՞ւմ հետ կցանկանայիք զրուցել:
Նիկիտա Խրուշչովի եւ Ջոն Քենեդու հետ:
Ի՞նչն է երիտասարդներին բերում քաղաքականություն:
Քաղաքական ակտիվությունը, դրական առումով կարիերիզմը, հայրենիքի ապագայի համար մտահոգությունը:
Ձեր կարծիքով կուսակցական երիտասարդներն ինչո՞վ են տարբերվում անկուսակցականներից:
Կուսակցական երիտասարդները համեմատաբար ավելի քաղաքականացված են:
Քաղաքականության մեջ լինելու պատճառով` ո՞ր նախասիրություններից եք ստիպված եղել հրաժարվել:
Ոչ մի նախասիրությունից: Այնպիսին եմ, ինչպիսին եղել եմ:
Ո ՞րն է Ձեր ամենառոմանտիկ հիշողությունը:
1996թ. Ապրիլյան մի գեղեցիկ օր էր: Առաջին անգամ ժամադրվել էի ապագա կնոջս հետ: Ծաղիկներ դրեցինք Ծիծեռնակաբերդում, սուրճ խմեցինք, քայլեցինք անձրեւի տակ: Անմոռանալի հիշողություն է…
Սնցած սերեր:
Իմ կարծիքով ավելի շատ դրանք հրապուրանքներ են եղել:
Ձեր ընտրյալը, կարո՞ղ եք հրապարակավ նրան սեր խոստովանել:
Իմ կինն է` Սուսաննան, ով շատ գեղեցիկ է, մշտաժպիտ, բարեհամբույր, հյուրասեր, ընկերասեր եւ միշտ դժվարությունների պահին կողքիս է: Մի քիչ դժվար է հրապարակավ սեր խոստովանել, բայց կասեմ` ես սիրում եմ իմ կնոջը:
Ծխախոտ խմիչք եւ մոլախաղեր:
Չեմ ծխում, ծխել եմ եւ թողել եմ ծխելը, կոչ եմ անում բոլոր ծխողներին այդպես վարվել: Խմում եմ, երբ որ միջավայրը տրամադրող է` մտերիմներիս հետ, սիրում եմ վիսկի, կոնյակ եւ տնական օղի: Ընկերական միջավայրում շատ սիրում եմ բլոտ խաղալ, եւ պարտվողը հյուրասիրում է մյուսներին:
Հաճախա՞կի եք դուք հյուրասիրում:
Չեմ սիրում պարտվել, աշխատում եմ միշտ հաղթել, բայց եթե պարտվում եմ, անպայման հյուրասիրում եմ:
Ի՞նչ եք պատրաստում խոհանոցում եւ ի՞նչ եք սիրում ուտել:
Որոշ ժամանակ վարձով եմ ապրել եւ պատրաստել եմ, ամենահեշտ եւ արագ պատրաստվող ճաշատեսակը` տապակած կարտոֆի;լ:, շատ լավ խորոված, գառան խաշլամա եմ պատրաստում: Ուտելիքների հանդեպ կապրիզներ չունեմ: մինչեւ հիմնական ճաշատեսակը բերելը ոտի վրա հասցնում եմ կշտանալ, բայց համեղ ուտել սիրում եմ:
Ի՞նչ եք երազում նվեր ստանալ ծննդյան օրվա առիթով:
Այդպիսի երազանք երբեք չեմ ունեցել:
Սիրու՞մ եք նվերներ անել, հատկապես անակնկալ նվերներ:
Հատկապես անակնկալ նվերներ սիրում եմ անել:
Նյութական ամենամեծ հարստությունը, որ ունեք:
Երեւանի իմ բնակարանը:
Իսկ ինչքա՞ն գումար կցանկանայիք իմանալ:
Եկել եմ եզրակացության, որ նյութականի մեջ երջանկություն փնտրելը հիմարություն է: Ինչպես տեսնում ենք մեր շրջաատում, ամենահարուստներն էլ խնդիրներ ունեն, եւ փողը միշտ քիչ է լինում բոլորի համար, երջանկությունը պետք է փնտրել մեր առօրյա կյանքի մեջ:
Ձեզ դու՞ր է գալիս հարցազրույց տալը:
Հարցազրույց տալը իմ աշխատանքի մի մասն է, բայց ցանկալի է, որ հարցազրույցը լինի այնպիսի թեմանների շուրջ, որոնց ես ավելի կոմպետենտ եմ:
Հարցազրույցների ընթացքում ո՞ր հարցն է նյարդայնացնում Ձեզ:
Ես աշխատում եմ համբերատարությամբ պատասխանել հարցերին:
Ինչպիսի՞ ապագա եք կանխատեսում Ձեզ համար:
Աստված ինչ կկամենա:
Ի՞նչ կուզեիք ավելացնել Ձեր մասին:
Ունեմ երեք երեխա, հրաշալի ընտանիք, սիրում եմ կյանքը:
Լինում է, չի լինում...
Հեքիաթ է լինում, հեքիաթում հայտնվում է երեք խնձոր, մի խնձորը` հարց տվողին, մի խնձորը` բաժան-բաժան ենք անում, տալիս ենք ընթերցողների, մյուս խնձորը իմն է, բայց քանի որ ես այլ միրգ եմ սիրում, դա էլ եմ տալիս ընթերցողներին:
Իսկ ի՞նչ միրգ եք սիրում:
Թուզ:
Շարքին մասնակցող նախորդ պատգամավորը` ՀՀԿ խմբակցությունից Սամվել Ֆարմանյանը ձեզ հարցնում է` ինչ անել:
Աշխատել, պայքարել եւ սիրել:
Այժմ ձեր հարցը շարքին մասնակցող մյուս պատգամավորին, ով դեռ չգիտենք, թե ով կլինի:
Ինչպիսի՞ն լինել:
Նշենք, որ 40-ամյա Շիրակ Թորոսյանն միջազգայնագետ-պատմաբան է, ԵՊՀ միջազգային հարաբերությունների ֆակուլտետի միջազգային հարաբերությունների եւ դիվանագիտության ամբիոնի դասախոս, Ջավախք» հայրենակցական միության նախագահ, «Հզոր հայրենիք» կուսակցության փոխնախագահ: Պատգամավոր է ընտրվել 2007թ, ամուսնացած է, ունի երեք երեխա:
Ավելի վաղ NEWS.am-ը ներկայացրել էր հարցազրույց ԱԺ ՀՀԿ խմբակցության պատգամավոր Արփինե Հովհաննիսյանի, Լեւոն Մարտիրոսյանի, Նաիրա Կարապետյանի , Հայկ Գրիգորյանի , Մարգարիտ Եսայանի, Գարեգին Նուշիկյանի, Հովհաննես Սահակյանի, Արտակ Զաքարյանի , Կարինե Աճեմյանի, Արտակ Դավթյանի, Սամվել Ֆարմանյանի, ԲՀԿ խմբակցության պատգամավոր Տիգրան Ուրիխանյանի, Էլինար Վարդանյանի, Վահե Էնֆիաջյանի, Նաիրա Զոհրաբյանի, ՀԱԿ-ից Լյուդմիլա Սարգսյանի, Հրանտ Բագրատյանի, Գագիկ Ջհանգիրյանի, «Ժառանգությունից»` Ռուբեն Հակոբյանի, Խաչատուր Քոքոբելյանի, Ալեքսանդր Արզումանյանի, ՀՅԴ-ից`Արծվիկ Մինասյանի , Աղվան Վարդանյանի, անկախ պատգամավոր Էդմոն Մարուքյանի հետ:
Շարքը` Ինգա Մարտինյանի