«Բլից հարցազրույցներ ԱԺ պատգամավորների հետ» շարքի շրջանակներում NEWS.am-ը ներկայացնում է իր հերթական հարցազրույցը: Այս անգամ զրուցել ենք «Բարգավաճ Հայաստան» խմբակցության պատգամավոր Լյովա Խաչատրյանի հետ:
Պարոն Խաչատրյան, ձեր գործընկերները վստահ են, որ ամենահետաքրքիր բլից հարցազրույցներից մեկը ձեզ հետ կստացվի: Կմասնակցե՞ք մեր շարքին:
Ոչ, այդքան չեմ կարող ստել: Իսկ լրիվ անկեղծ լինելու համար էլ տարիքս թույլ չի տալիս:
Մեր շարքին մասնակցելու համար սուտ խոսելը պարտադիր չէ, կարող եք կիսով չափ սուտ խոսել:
Տեսնում եմ, կարդում եմ, հետեւում եմ պատասխանողներին:
Տեսնենք ինչ կստացվի: Լյովա Խաչատրյան` մարդ…
Մարդը դու ես, ես պատգամավոր եմ:
Փաստորեն պատգամավոր լինելը հակասո՞ւմ է մարդ լինելուն:
Այսօր այդպես է ստացվում:
Ի՞նչ հատկանիշներ ունեք. առավելություններ, թերություններ, թուլություններ…
Դուք պետք է ասեք, այսքան տարի է` քաղաքականության մեջ եմ, կողքից ավելի լավ է երեւում:
Քաղաքականությունը ի՞նչ է, կսահմանե՞ք;
Ամենաշահավետ բիզնեսը ոմանց համար:
Իսկ ձեզ համա՞ր:
Ինձ համար դուք սահմանեք:
Ինչպիսի՞ մանուկ էիք:
Ժիր ու սիրունիկ:
Ո՞վ է ձեզ այդպես խաբել:
Լենին պապին:
Ի՞նչ էիք երազում դառնել մանուկ ժամանակ եւ ի՞նչ եք դարձել:
Ինչ եմ դարձել, գիտեք: Պաժառնիկ էի երազում դառնալ: Պաժառնիի հայաթում էի ապրում:
Ի՞նչի չդարձաք «պաժառնիկ»:
Նոր տուն ստացանք, տեղափոխվեցինք, հեռու գնացինք:
Պատգամավորի բակ տեղափոխվեցի՞ք:
Դե տարբերություն չկա աշխատող պատգամավորի եւ հրշեջի մեջ: Նմանությունն այն է, որ երկուսն էլ հրատապ խնդիրներով են զբաղվում:
Ձեր հաջողության հասնելու գաղտնիքը ո՞րն է:
Աշխատասիրությունը եւ ազնվությունը:
Ձեր կյանքի ամնամեծ սխալը:
Պետք է անկեղծանամ եւ ասեմ` վերադարձս Հայաստան:
Զղջո՞ւմ եք այդ քայլի համար:
Չեմ զղջում, բայց դրսում շատ բանի էի հասել:
Ինչո՞ւմ եք ձեզ ամենաշատը մեղադրում:
Արդեն ասացի, որ վերադարձա Հայաստան:
Այստեղ էլ քիչ բանի չեք հասել, վա՞տ է, պատգամավոր եք:
Երբ անունը կա, ամանումը` չկա, իսկ այնտեղ եւ այն կար, եւ՝ մյուսը:
Ապարանցի լինելը առավելությո՞ւն է, թե՞ թերություն, գուցե առանձնահատկությո՞ւն Հայաստանում քաղաքականությամբ զբաղվելու համատեքստում:
Ինչպես գեներալի դեպքում են ասում, հիմա էլ ապարանցի լինելը կոչում չէ, առավելություն է: Ապարանցի լինելը ինձ շատ է օգնել կյանքում, մասնավորապես` ապարանցու հատկանիշները` ազնվությունը,պարզությունը,վախ չունենալը:
Ապարանցիների մասին անեկդոտներ պատմելիս չե՞ք նեղվում:
Չէ, ես ինքս եմ շատ անեկդոտներ հորինում եւ պատմում:
Դե պատմեք, վերջին անկեդոտը ապարանցիների մասին:
Մեկը գալիս է Ապարան, մարդ է ման գալիս, հարցնում է` էսինչի տունը որտեղ ա, ասում ա` նստի տանեմ: Համոզում է, տանում հասցնում տեղ, ասում է` էս ա տունը: Էս մարդը մտնում է, թե բա, արա էսօր ձեր ապարանցիներից մեկին հարցրեցի` որտեղ ա ձեր տունը, մինչեւ չնստա ուսին, չբերեց ցույց տվեց, էդ էլ թե` հլը մի նստի գնանք տենանք` էդ ով էր:
Հայաստանի լավագույն քաղաքական գործիչն ո՞վ է:
Երբ քաղաքական դաշտը ձեւավորվի, կորոշենք:
Ինչի՞ց եք հոգնում եւ ո՞ւմ եք օգնում:
Օգնում եմ որքան հնարավոր է օգնության կարիք ունեցողներին, եթե հնարավորություններս ներում են: Հոգնում եմ դատարկությունից:
Ե՞րբ եք լռում:
Երբ ասելիք չունեմ:
Ո՞ւմ կամ ի՞նչն եք սիրում եւ ատում:
Սիրում եմ իմ հողն ու ջուրը, դրա համար էլ վերադարձել եմ ակունքներ:
Ովքե՞ր են ձեզ դավաճանել:
Նման բաներ չի եղել;
Իսկ դուք ո՞ւմ եք դավաճանել:
Ես նույնպես սուրբ չեմ:
Ստո՞ւմ եք:
Մասամբ (Ծիծաղում է-NEWS.am):
Ի՞նչը կարող է ձեզ հուսահատեցնել:
Ոչինչ,շատ բան եմ տեսել կյանքում, ոչ մի բանից էլ չեմ հուսահատվում:
Ի՞նչն է ձեզ զարմացնում եւ զայրացնում:
Ինձ զարմացնում է, երբ փորձում են խաբել ինձ, դա շատ դժվար է:
Իսկ դուք կարողանո՞ւմ եք տեղը տեղին խաբել:
Չէ, ինձ թույլ չեմ տալիս, դա փոքր մարդու գործ է:
Ձեզ երջանիկ զգո՞ւմ եք:
Որքանով հնարավոր է, փորձում եմ պիտանի լինել իմ հող ու ջրին:
Ձեր հպարտությունը:
Որ հայ եմ եւ ապարանցի:
Դուք Ձեզնից գո՞հ եք:
Ոնց կարելի է նման բան ասել, միշտ էլ կան չարած, չհասցրած գործեր, երազանքներ:
Հոգսեր:
Չեմ հասցնում բոլոր ծրագրերն իրագործել, բոլոր դիմողներին բավարարել:
Կարո՞ղ եք մի այնպիսի բացահայտում անել ձեր մասին, որ բոլորի բերանը բաց մնա:
Ես բաց բերաններից խուսափում եմ: (ծիծաղում է-NEWS.am):
Ֆոբիաներ:
Ապարանցուն ի՞նչ վախ: Իսկական տղամարդը նա է, ով գիտի վախն ինչ է, ոչ թե վախենում է: Ես գիտեմ` վախն ինչ է, վախն այն է, որին պետք է պատրաստ լինել:
Հոբբիներ:
Ավանակների նկարներ եւ արձաններ եմ հավաքում, հավաքածու ունեմ:
Հետաքրքիր է, այդ հոբբին մինչեւ ԱԺ գնալն ունեի՞ք, թե՞ գնալուց հետո սկսեցիք հավաքել:
Միշտ էլ սիրել եմ, հավաքել եմ, նաեւ պատգամավոր ընկերներից շատ նվերներ եմ ստացել: Սովորություն ունեմ, ով ինձ ավանակի արձան է նվիրում, իր անունով էլ կոչում եմ:
Եւ ո՞ւմ անուններով ավանակների արձաններ ունեք:
Կգաք մեր տուն, կկարդաք, կիմանաք, լիքը ծանոթներ կգտնեք: Նույնիսկ եղել են դեպքեր, երբ ընտանիքով վիճել են,թե ում անունը պետք է դրվի:
Կա՞ն հայտնի քաղաքական գործիչներ, գործարարներ, որոնց անուններով ավանակների արձաններ կգտնենք: Չե՞ն նեղացել:
Այո, կան, չէ, չեն նեղացել, ինչի՞ պիտի նեղանան,նվիրողները հիմնականում հումոր ունեն:
Եթե հնարավորություն ունենայիք մեկ օրով զբաղեցնել ձեր երազանքների պաշտոնը, դա ո՞րը կլիներ:
Մարդ պաշտոնը:
Անցած սերեր:
Ինչպես բոլորը:
Ինչքա՞ն:
Մեկ:
Ո՞վ է կինը, կսահմանե՞ք:
Սենտիմենտալ բաներից չեմ ուզում խոսել:
Աֆորիզմն ասում է` ամեն դեպքում` ամուսնացիր, եթե բախտդ բերի, երջանիկ ընտանիք կկազմես, չբերի՝ փիլիսոփա կդառնաս: Դուք կարո՞ղ է այդ աֆորիզմին եք հետեւել եւ ուզում եք փիլիսոփա դառնալ:
Ես փիլիսոփա ծնվել եմ:
Ինչպիսի՞ն պետք է լինի ձեր կողքի կինը, ասեք չափանիշմներին, գուցե այս հարցազրույցի միջոցով գտնենք:
Նման կազմակերպություններ շատ կան, հավես ունենամ, կդիմեմ: Որտեղի՞ց իմանամ` ինչպիսին պետք է լինի, չունեցած բանի մասին ո՞նց կարող եմ իմանալ: Իմանայի, ամուսնացած կլինեի:
Հանուն սիրո կամ սիրելիի ինչի՞ եք պատրաստ:
Կարո՞ղ եմ լռել:
Սեր խոստովանելու լավագույն ձեւը ո՞րն է:
Եթե իմանայի, մինչեւ հիմա խոստովանած կլինեի էլի:
Փաստորեն, չե՞ք խոստովանել:
Ապարանցին ասում ա` կոպես կուգա:
Ցանկանո՞ւմ եք ամուսնանալ, թե՝ ոչ:
Դա հա՞րց է, թե՞ առաջարկ:
Հարց:
Նորից չկպավ:
Ծխախոտ, խմիչք եւ «լեւի» գնալ:
Ծխում էլ եմ, խմում էլ եմ, իսկ «լեւի» հասկացությունը առկա է այն դեպքում, երբ կա «պռավի» հասկացությունը: Ես ամուսնացած չեմ:
Գիշերային ակումբներ եւ կազինոներ:
Վերջին տասը տարին Հայաստանում` ոչ:
Իսկ մինչեւ այդ տասը տարին:
Եղել են, տարեկան մի քանի անգամ արտերկրում գնում էի հանգստանալու:
Հանգստանալու կազինոններո՞ւմ:
Նաեւ կազինոներում:
Խոհանոցում սպառո՞ղ եք, թե՞ պատրաստել էլ գիտեք:
Ամեն ինչ կարող եմ պատրաստել, ավելի քան 20 տարի ինքս ինձ համար պատրաստել եմ ձմեռվա ցրտին, ամառվա շոգին:
Սիրելի գույնը:
Ծիրանագույն:
Սիրելի բանաստեղծությունը:
Մանկական գրածներս:
Հիմա չե՞ք գրում:
Չէ, հիմա կարդում եմ:
Ո՞ւմ կամ ի՞նչ եք կարդում:
ԱԺ օրենսդրական նախաձեռնությունները եւ օրենքները:
Վերջին կարդացած գիրքը կհիշե՞ք:
Չէ, դեպուտատն ի՞նչ գործ ունի գիրք կարդա, որ հիշի;
Բա ինչի՞ հետ գործ ունի պատգամավորը:
Օրենքների:
Բայց այդ օրենքները գրելու համար մեկ-մեկ պետք չէ՞ գիրք կարդալ;
Մասնագիտական գրքեր:
Իսկ գեղարվեստական գրքե՞ր:
Վաղուց չեմ կարդացել: Վերջին անգամ կարդացել եմ հիանալի բանաստեղծությունների ժողովածու` «Ծաղկած փշերն իմ հոգու», հեղինակը` Ծաղիկ Ռուբո:
Ինչի՞ թողեցիք գրելը եւ ե՞րբ:
Երբ մանուկ հասակից մի փոքր առաջ գնացի եւ հասկացա, որ անհեթեթություններ եմ գրել:
Ձեր ներշնչանքի աղբյուրը ո՞րն է:
Վարդապետի աղբյուրը:
Մեր շարքին մասնակցող նախորդ պատգամավորը` ԲՀԿ-ից Մարտուն Գրիգորյանը ձեզ հարցնում է, թե արդյոք համամի՞տ եք Սողոմոն իմաստունի հետ, ով ասել է, թե ամեն բան անցողիկ է:
Սողոմոն իմաստունը մատանի ուներ, որի մի մասում գրած էր` ամեն ինչ անցողիկ է, երբ բարկանում էր, կարդում էր մատանու վրայի գրածն ու հանգստանում, մոռանում էր բարկությունը: Մի անգամ շատ է բարկանում եւ կարդալով գրածը` այն չի անցնում, մատանին շպրտում է եւ հանկարծ նկատում է, որ մատանու ներսի մասից էլ է բան գրած` դա էլ կանցնի:
Ձեր հարցը շարքին մասնակցող հաջորդ պատգամավորին:
Ինչքանո՞վ է նա անկեղծ եղել իր պատասխաններում, ո՞ր մասն է ստել:
Նշենք, որ 57-ամյա Լյովա Խաչատրյանը մասնագիտությամբ ճարտարագետ-մեխանիկ է, աշխատել է Աստրախանի (ՌԴ) երկաթբետոնեկոնստրուկցիաների գործարանի գլխավոր տնօրեն: Պատգամավոր է ընտրվել դեռեւս 2007թ, ամուրի է:
Շարքը` Ինգա Մարտինյանի