Երեւան-Գյումրի ավտոճանապարհին՝ Հոռոմի խաչմերուկում տեղի ունեցած ողբերգական վթարի գործով մեղադրյալ 44-ամյա Մանվել Վարդանյանին հոգեբան են հատկացրել: Այս մասին NEWS.am-ի թղթակցի հետ զրույցում ասաց փաստաբան Լիանա Բալյանը:
Նա նշեց, որ առայժմ իր ներկայացրած մյուս միջնորդություններից որեւէ նորություն չկա: Իսկ դրանք վերաբերում էին վարորդին «Դատապարտյալների հիվանդանոց» տեղափոխելուն, քննիչին բացարկ ներկայացնելուն, պաշտպանյալի տված ցուցմունքները ոչ վերաբերելի ապացույց, այսինքն՝ չեղյալ ճանաչելուն եւ այլն:
Այժմ փաստաբանը նոր միջնորդություն է ներկայացնելու, որպեսզի իրեն ծանոթացնեն այն բոլոր փաստաթղթերին, որոնք իր պաշտպանյալը ստորագրել Է: Նա տեղեկացրեց, որ նոյեմբերի 12-ին՝ երեկոյան, լույս չի եղել եւ իր պաշտպանյալին բջջային հեռախոսի լույսի տակ ստորագրել են տվել փորձաքննություններ նշանակելու մասին որոշումները, որոնք իրեն դեռ չեն ծանոթացրել: «Ինքը շատ վատ վիճակում է գտնվում, ամսի 18-ին տեսակցել եմ, շատ հուզված էր, արտասվում էր, շատ տխուր հոգեվիճակում»,-ասաց փաստաբանը: Լիանա Բալյանից տեղեկացանք նաեւ, որ կալանքի որոշումը չեն բողոքարկելու՝ ելնելով նրա անվտանգությունից:
Ինչպես ավելի վաղ հաղորդել էր NEWS.am-ը նոյեմբերի 10-ի երեկոյան՝ ժամը 19։15-ի սահմաններում, խոշոր ավտովթար է տեղի ունեցել Շիրակի մարզում. Երեւան-Գյումրի ավտոճանապարհի` Հոռոմ գյուղի խաչմերուկում մարդատար «Գազել» մակնիշի ավտոմեքենան բախվել է «Կամազ» մակնիշի բեռնատարին, ինչի հետեւանքով «Գազելը» պայթել է։ Նախնական տեղեկություններով՝ վթարի պահին «Գազելի» մեջ եղել է 14 ուղեւոր, որոնցից 7-ը տեղում մահացել են, իսկ 7-ը՝ տեղափոխվել բժշկական կենտրոն։ Փաստի առթիվ Շիրակի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի՝ 242-րդ հոդվածի 3-րդ մասի հատկանիշներով։ «Գազելին» բախված «Կամազ» մակնիշի բեռնատարի վարորդը՝ Մ.Վարդանյանը, կալանավորված է: