Շիրակի մարզում նոյեմբերի 10-ին տեղի ունեցած ողբերգական ավտովթարի հետեւանքով վիրավորված 13-ամյա Էդմոն Սիմոնյանը շարունակում է ապաքինվել Երեւանի թիվ 3 մանկական հիվանդանոցում:

Բժշկական կենտրոնի տնօրեն Նիկոլայ Դալլաքյանը NEWS.am-ի թղթակցի հետ զրույցում հայտնեց, որ երեխայի վիճակը նորմալ է:

«Վիրահատվել է, ապաքինման փուլում է, դեռ հայտնի չէ, թե երբ դուրս կգրվի հիվանդանոցից, ապաքինման ընթացքը ցույց կտա»,- ասաց նա:

Տուժածներից հիվանդանոցում է նաեւ 36-ամյա Զարուհի Հովհաննիսյանը, որն էլ բուժվում է Գյումրիի բժշկական կենտրոնում:

«Զարուհու վիճակը բավարար է, հետվիրահատական շրջանում է, բարդացումները բացառված են, ոչ մի հետեւանք չի մնալու»,- մեզ հետ զրույցում ասաց հիվանդանոցի տնօրեն Արմեն Իսահակյանը:

Նշենք, որ գործով կալանավորվել է բեռնատարի վարորդը՝ 44-ամյա Մանվել Վարդանյանը: Նրան մեղադրանք է առաջադրվել 242-րդ հոդվածի 3-րդ մասի հատկանիշներով:

Ինչպես ավելի վաղ հաղորդել էր NEWS.am-ը նոյեմբերի 10-ի երեկոյան՝ ժամը 19։15-ի սահմաններում, խոշոր ավտովթար է տեղի ունեցել Շիրակի մարզում. Երևան-Գյումրի ավտոճանապարհի` Հոռոմ գյուղի խաչմերուկում մարդատար «Գազել» մակնիշի ավտոմեքենան բախվել է «Կամազ» մակնիշի բեռնատարին, ինչի հետևանքով «Գազելը» պայթել է։ Նախնական տեղեկություններով՝ վթարի պահին «Գազելի» մեջ եղել է 14 ուղեւոր, որոնցից 7-ը տեղում մահացել են, իսկ 7-ը՝ տեղափոխվել բժշկական կենտրոն։